Mumbai Tuisunsuo 12/10/08 Vol 1 Issue 7

H No.201, Sterling Apartments. Church Lane, Kalina, Santacruz(E), Mumbai-98

Darsiemlien Ruolngul

Nikhat lai khan internet ka surfing ka naah Mumbaia ka um laia Mizo Directory ka hmu fuk hlau el a. Chu Directory-a chun ka hming le address chu hieng hin a’n ziek a: Pu Darsiamliana, H.No. 201, Sterling Apartments, Church Lane,Kalina Santacruz (E), Mumbai-98, tiin. Ka hang tiem zo chu ka lungril le ka ngaituona chu kum 1996 ah kir nawk in, Mumbai ka tlung hlim lai vel le in hluo ding zonga ka buoi nasat ziehai kha ka mitthlaah a hung inlang ruoi ruoia, ka khuo a suk sawt ngei el ie!

January 8, 1996 khan Protector of Emigrants sin chel dingin Mumbai ka lut ve a. Ka fe hmaa inthok khan Mumbaia In hluo man (house rent) a to el khelah deposit khom thahnem tawktak pek a ngai hlak thu an mi lo hril tah a, ka hophur lawk hrim kha a nih a. Mumbai Ka tlung hlim chun ka ruolpa vai pakhat leh Hotelah zan hni kan riek phot a, a zan thumna a inthokin MES Colony, Kalinaa Sipai family quarter-a common room chikte, in hluo ding kan zong sunga umna dingin thlakhata Rs. 3000/-pek dingin kan hluo ve a. Kan in neituhai kha an fel khop ela, zingkar breakfast an mi siempek a, sunah office ah lunch fain, zantieng bu chu 2-Star Hotel, Kalina ah ka fak hlak a.

Patling ve zet chuonga mi common rooma rieka khawsak zing el chu thil remchang bek bek a ni naw leiin a’n hma thei ang taka hluo thei ding IN ka zong tah a. Kan office kha public dealing office a ni lei khan office a mi hung pan, ka nel deu le ka ringzo deu taphothai kuomah in ka zong thu chu hrilin, mi zong pek ve dingin ka lo fiel tawl a. Nitin el hin ‘chulai, khalai chun in hluo ding a um’ an ti na tieng tieng ka tlan kuol a. Kan office hi Santacruz(W)-a um a ni leiin chutaka inthoka hla bek bek lo, Juhu, Andheri, Versova, Khar, Bandra, Kalina etc vel a chun zantieng office tin zatin kan vak hlak a. A tawp a tawp ah Mumbaia ruol ka man thar, Mr. Mustafa Punjabi’n a mi hmu pek, H.No.201, Sterling Apartment chu hluo dingin kan sukfel tah a. A hluoman khom thla khatah Rs.6500/-(Cheng sang ruk le za nga), deposit chu Rs.1.25,000( Cheng nuoi khat, singhni le sang nga) a nih. Deposit ding hi ka nei dai naw leiin ka ruolpa Mustafa Punjabi hin a mi deposit pek a, a hnungah muongchangin ka rul nawk a nih. ( hi ka in hluo hi ka suoksan tawm khan Rs 8500/-p.m. a ni hman)

Ka ruolpa Mustafa Punjabi le hin kan inhrietna la sawt naw hle sien khom kan inngainat dan hi inthuk tak a nih. A ma hi Recruiting Company-a Proprietor a ni a, Special magistrate khom a ni bok a, pa rawnkai, ruol le pai siem thiem le mi indik tak, pawl inhoi em em el hi a nih. Ama hi film personalities hming inlar tak takhai leh an inkop zing zing hlak leiin hrietngai le ruol khom a hauva, ama zar hin filmstar inlar ve tak tak khom iemanizat ka hmelhriet ve phah a. Voikhat lem chu kan sungin Film City ah mi thuoiin, khanglaia filmstar hming inglar ve tak tak iemanizat khom thla dam kan va lak pui a. Johny Lever, film comedian lem hi chu ka office-ah khom voi iemanizat a hung thuoi hlak a, kei khoma personal takin ka lo inhmelhriet pui ve nghe nghe a nih.

Ka in hluo ding hmu thar chu February 17, 1996 zantieng ka’n son lut a. Ka’n son zan hin ka ruolpa Mustafa hin ruol pahni hung thuoiin, parte (bouquet) leh an mi hung lawmpui a. Kan sangnu Nk.Dinpuii, Air India-a Air Hostess chun a ruolhai Air Hostess ve bok paruk lai hung thuoiin, sa le fak le dawn ding thil dang dang an hung chawi bok a, bufak tlangna dam neiin khawvar vangin ka in thar chu kan lawm a nih. Inhoi kan ti tlang tawl hle el.

Sterling Apartments-a ka um hlima inthokin kan apartment ground floor-a dawr (Quinny Store) neitu, Mr. Quinny le hin ruoltha in kan inman nghal a. Ama hin ka inthar sukthieng (purify) dingin Catholic Priest, Our Lady of Egypt Chapela thawklai a mi ko pek a. Ka in thar ka hluo zan hnina zantieng 8.pm vel ah, Priest chu a thuom famkima inthuomin, thalai nunghak le tlangval 20 vel leh candle chawi sengin ka in chu an hung lut a. Priest chun tuiinphitna (water sprayer) hmangin tui thienghlim ( holy water) chun pindan kil tin chu thuinsam pumin a phu khum a, ramhuoi thlarau le thil thanaw umhai po po chu hnotdokin a sukthieng ta a nih. Ka lungril takin ka lawm hle. Chuonga ka in a sukthieng zo chun lawmthu hrilin, sum khom tlawmazawng ka pek ve a, kan lawm tlang seng niin ka hriet. A hnunga chen khom hi Priest le hin khawlaia kan inhmu chang khom kan in chibai zie ta hlak a nih.

………….Sunzom pei ding

TUOLSUNG CHANCHIN

## Tarik 11th Oct 2008,Inringni khan ei Fellowship le Welfare thuoitu hai chun Pu Darthangluoi a in, Colaba-ah hmatieng pei-a eiin thuoi le in-enkawl dan ding riruong in,in hmukhawmna an nei.A zan tieng hin Pu Darthangluoi hai nupa’n thlaithleng an buot sei pek nghal.Ei hotuhai hmalakna zarin, in enkawldan le inthuoidan kawng-ah,dan-le dun ei nei vat eiin beisei hle.

## Pathienni hmasak tarik 5th Oct 2008 inkhawm trin khan,ei thuoitu Darzakhum Songate chun puithu fahran in,Lalnunthieng a PG thar hawngna hunser a nei.PG-a um hai kuoma infuina thatak ahril zovin Dr Kimi-in tawngtaina’n an hlan.Hi huna hin Pi Esther Songate, Dr.Kimi le an pa Darthangluoi an thang el baka,MumbaiTuisunsuo Editorial Board member hai khawm ditsak taka fiel an ni vena sukpuitlingin,zanbu fak chenin an zu uop ve.Chanchin ei dawng pei danin,fak le dawn an hnik el baka,Editorial Board Member a then lem chu lenglai an ni ang hrimin, zan lenghnawtsuo khuong chen deu thaw-a tlatlum an um ni in ei hriet.

## Tv.Lalthasang,Donald,Carlos Lienlal le an ruol thenkhat hai chun tarik 4th oct, 2008 khan Welfare Secretary Stephan C Hmar a in Powai-ah, a pa lo boral na thuah ralna thlaithleng an siem.

## Hun sawt tak el ei ni lai hung thang ve ta, ei biekin a hai thu hrilin le an hman dan pei-a bawng sung in hnik fahran a mi sung pek hlak Pu Lalhmunsang khawbung(Thalai lai chu Ruthi Pa ti-a hriet lar lem) chuh tarik 10th Oct,zirtawpni khan tuithaphai(ccpur) tieng a mi lo liem san tah.

##Chuong ang bawkin,Nk Lilypui chuongchen Mumbai hung-in zina,eini lai hung thang ve chuh tuithaphai tieng zirtawpni 10th Oct khan a lo liem tah.Train station-a van thla tu khawm an um nawk ni-in chanchin ei lo dawng.Punjabi chawl le Powai val thenkhat chu an khuo a sawt deu ruoi ding a hawi ngei!

## Ei tlangval John Sanate,nikhat lai-a damnawna lei-a,Durga Hospital a enkawl zing chu,thattieng pan peiin,tarik 7th Oct 2008,thawleni khan damfel ta-in PG Warden Lalnunthieng in a lo lawm lut nawk tah.

##David Sinate,EXIM Bank a General Manager ni lai mek chuh, hung tlung ding October thla tawp hin Conference-a thang dingin Sydney,Australia pan a tih.

## JamesThanglien,ei hriet thei dan dingin Carlos Lienlal a sang pa chu,inringzan 11th Oct khan Mumbai-hai ami lo hung zawm ve tah.Thiemna le hrietna tieng dangchar na lei-a mel za tam hungin zin ani leiin,nakie khawhnung-ah a ziekfung in hrat taka ro a la rel ding hih MumbaiTuisunsuo chun beisei taka a thlir el bak-a, a ditsak hle bawk anih.

## Tarik 9th Oct, 2008 Ningani khan Welfare chun Directory Committee indinin hotupa Darzakhum Songate inah umni khamin,sunnitla zakin ei Directory ding an buoipui.Ei Directory ding hih November 2008 hma ngei a zo hman tum anih.Zantieng hin Darza le a sung haiin thlaithleng an buotsai pek nghala,member hai khawp le tlai takin an hrai tawl

## Winter Sports Meet 2008,ei unau Pune hai le ei nei ding le in zawm hin tulai ei football player thiem le zei tak tak hai chuh BKC ground ah nasatakin an in siengsa mup mup.Ei hotuhai hieng U Darza,U Luoia hai khawm an hungin khel ve el chau ni lovin player hai an hung uop mawi ve zing bawk

TAWNGBAU LAKKHAWM

## Inkhawm ei trin char hin chu Jaocb Shakum laka inthawk in ka’n bie hmang tawp el anih..MumbaiTuisunsuo Rs 10/- in a mi hnaw’k ding ka hrieta..chun naw’m..... inkhawm trin char hin ka fe nghal hlak na san chu....
Nk Linda Singthangpui(Zankalmawite)

## Mumbai hih a boruok an hawi chau ni lovin..ie....a ngei khawm hih ei ngei anih.....veng tienga inthawka hung sa’r rak lo hai khawm hih...an hang um sawt deuva...sa’r le ngo vur in ka hmu tawl chu tie....
Pu Lalramthang Amo

## Nunghak triple hlui kan ta aw....mi sawisak mei mei ta naw ro......
Nk Elizabeth Khawbung

## Pathienni inkhawma hung khawm hih a chang chu a hlawk nawh ka ti nuom vang el anih..kalman tam leh.....Inkhawm trina ka ring ka hang da’kfan khawm hin...Kalina lai bu fa-a mi ko tum hlak um ngai lo...
Nk Chawngrosing(Ex-Miss Parbung)

## (..Ring..Ring..)..Hello...bhai iem i thaw..i buoi..?..ie...ka ruol pa’n a dit che a..ieng tinam i ngai leh..?.vawisun ka inah a khat chauva um ding anih..kei tu hin sin-ah ka fe ding........(call a suktawp..)
Pu Laltuosang

## ...ka hrang a sie ti thrak naw ro....ei hrang a sie naw chun ..in khawm ku hih a fai thei le...
Nk Alice Malsawmkim

##...nuhmei ei zuk nek dek dek ei ti leh..football pet an hung rawt-a.....mi hnung-ah thi-pu-hakin ka tlan phak tawk anih....
Pu Lalrothang(Just Married)

## ..kan sin thawna hih a hming an thleng nguna,Directory buoipuitu hai chawk buoi hle sien khawm...an hawi le a that lemna chu fai kawng-ah 5 star hotel-a thawk haiin mi tluk lo ding hai-a...(trin ding zat-in an in sil tir zie..)
Nk Chingngeizual Varte(Zuolte)

## ...pathienni khan kan khawm tum vei leh...ka veng suok lei-a ka IC ka’ng...lan siem thra hman lo.....inkhawm ta nek nek-in...ek-in a ka hun po po ka hmang zo deu thaw anih..
Nk JudyBrown Huolngo

## ... U Sepa a chairman sung chuh hungin khawm kan tum le..nakie thawlawm dawl dingin mi ko nawk nghal a ta...
Nk Lisa Lalrosiem(PG Model) & Nemzahat(PG Amitabh)