Sunday, October 19, 2008

Mumbai Tuisunsuo 19/10/08 Vol 1 Issue 8

H No.201, Sterling Apartments. Church Lane, Kalina, Santacruz(E), Mumbai-98 - Part-II

Darsiemlien Ruolngul

Mumbaiah fumfe taka IN hluo a, ka hang inbengbel ve hnung chun eini mi tu tuhai am an uma tiin ka hang ngaiven a. Delhia ka umlaia Mumbaia sinthawa lo um tah, David Lienzahau Sinate address le telephone Number zong dokin ka hang contact a. Ama khom nuhmei nei thar hlok, honeymoon an hmang zing lai vel hun kha a nih a, Annu Pi Sarah hi Air Hostess sin a la thaw lai a ni leiin hun awl hau naw hle sienlakhom zan khat chu inhmu tlangin Hotel changkang ve deuvah bu kan fak tlang a. A hnung tieng lem chu an in annawleh ka in tieng kan fak tlang deu zing hlak ta a.

Pu David Sinate ti lo eini mi dang an um ve naw am ani ka ti chu Pu Rattanlal Amo, ONGC ah officer lien pakhat a lo um ve zing ti ka hriet tah a. Pu Rattanlal Amo hai sung ( a nuhmei le an naunu Revika Amo) hai hi ONGC Colony hmun kilkhawr deuva um an ni leiin inpan a harsa kan ti ve ve ning a ta, phone-a inbiek khel chu thaw thei rak kan nei nawh a. Chu khelah ama Pu Amo hi Darngawn makpa ni silo, Thaibawi Association-a Vice President kai thei hiel khopa changkang a ni ve lei khan hang suok dok vel kha Home Minister-a inthokin permission hmu harsa a ti ve deu hlak khom ni mei a tih. ( ‘Darngawn ni silo Thaibawi Association-a Vice President kai thei’ ka ti hi a umzie hang hrilfie met inla. Darngawn makpahai po po hi chu thaibawi dinga ngai sa anni ang ngeiin ngairuotna (imaginary) in Thaibawi Association indin a nih a.Hi dungzui hin chu ei Welfare Chairman Pu Darzakhum Songate le Secretary Pu Stephen C. Hmar hai khom hi Vice Chairman of Thaibawi Association an ni ve ti na ni chu! Mumbai a hin Darngawn makpa dang an la um am aw?) Mumbaia ka hang um sawt deu hnung lem khan chu Pu Amo le hin kan inpawl thei ta khop el a, Ka ina a mi hung pan changin Hmar hla dam ka lo sak pui a, ama khom a khuo a sawt thei ve hlein ka hriet. Pu Amo hi tuhin chu ONGC ah Director (or above) rank a ni tah ka ring. Kum 2004 khan Delhia a hungin a mi hung phone a, kha bak kha chu kan inbiek zui ta nawh niin ka hriet. Mumbaiah an la um a ni chun anni sung hi Welfare fee dam dawl ve unla, eini lai inzel tir tum hram hram ro aw.

Hienga khawsawt tak le inrieng taka iemani chen kan um hnung hin Dr.Laldaikim, Defence Ministry hnuoia Civilian Medical Officer dinga UPSC in a thlang chu Mumbaiah posting hmuin a hung zom a, Hmar mi kan pung pei leiin kan lawm hle el. Quarter lien deu hluoin, 4th Pasta Lane, Colabaah a uma, keini rawi inpawl khawmna takin kan hmang hlak. Hun iemani chenDavid Sinate hai khom Goregaon-a inthokin Nestle House, Worli-ah an inson a, Kan inngai tawl vieu ning a tih, kan kar hla tawl vieu sienkhom week-end chu kan inhmukhawm deu zie hlaktho a nih.Tuta David Sinate haiin Quarter an hluo hi chu Mumbai ka suoksan hma deuva an hluo niin ka hriet.

Dr.Laldaikimin a hluo hmasak 1st floor-a mi khan historical importance a nei a nih ti kha ei hriet tawl am le?Kha flat kha Zulfikar Ali Bhutto, Pakistan hai thuoitu ropui khan partition of India hmaa a sawt tak lo hluo hlak a nih a. Pindan hrang hrang ka lut changing ‘hienga hin Z.A.Bhutto a thung/ a zal hlak ding a na’ tiin ka ngaituo hlak a, a kar leh kan va riek chang dam hin Bhutto thlahrang hung el a ta sien, ti dam ka ngaituoin, ka’n za deu huou chang a um hlak chu tie!

Ka in a khan bu kan fak tlang ngun bok a, Kolivery Village a Kelsa le Arsa zorna le Air India colony tieng hnaia Voksa dawr neituhai khan chu an mi hriet hne khop el. Khanglai hun a khan chu an dawra poisa mimala sung rawn pawl tak ka ni el awm de aw, ka ti hlak. Thil ho deu deu hang zepsa vak inla: (i)Khanglai khan Dr Kim hi mithienghlim, uisa fa ngailo, uisa chungchang ei hril khoma ngai nuom lo hlak kha a ni a. Voikhat chu Pune-a Bible student haiin UISA an mi hung thon kha inhnik deuvin ka suong a. Dr. Kim phone-in, Pune haiin Sakhi sa an mi hung thon ka suonga, hung fa rawh aw tiin ka fiela. Ama khoma ka fiel ang chun a hung a, inhnik ti takin kan fak a. Kan fak zo hnung khom chun ‘Sakhi sa chu a lo va’n hnik lawm lawm de’ a ti deu zing el a. A zingnawk chun ka phone-a, Zankhata ei hme, Sakhi sa tia ka hril che ku kha Uisa a nih aw! Kan hang ti a, A lungsen ka ring deu chu a lung a lo sen awzawng nawh a, ‘ei fak lai khom khan uisa a ni ka ring deu hrim a nih’ a hung ti a, kan innui liempui ta mei mei a. Chu hnung chun ‘Uisa ka suong’ tia phone-a ka hril zatin vai voi neka inrangin a hung tlung zie hlak an tah! (ii) Khang lai khan chu ka ina bu kan fak tlang pha chun voksa chartang le Ar pum but, a tuihang leh hme a, bu kan fak over hlak lei khan David Sinate hi an nu’n ka ina bufaa a hung kha a khap chie naw a chu a phal bek bek ngai nawh a, a hung ta laklaw si khan chu zanah inlawi ngam ta ngailo, a riek hi a tul deu zing hlak. Khang lai hun dam kha a lo inhoiin ngai a va um ta ngei de aw!

....Sunzawm pei ding....

(Pu Darsiemlien Ruolngul hih Govt of India,MHRD(University Division)aUnder Secretary sin chel lai mek anih.A sung hai leh tuhin Delhi-ah an khawsa)


TUOLSUNG CHANCHIN

**Prof Dr Vanlalnghak of Shillong, Tv Thankhum of Rengkai, Pu Enga Hmar of Jiribam le Tv Rothanglien Khawbung of Aizawl hai chu Maharastra-a ,Marathi-mi-ni-lo hai suknawmnatna le inzawma Seminar thang dingin inrinnizan tarik 17th Oct 2008 khan Mumbai an hung inzin. Thawtanni zingkar tarik 20th Oct,2008 hin Mumbai an liem san nawk nghal ding chanchin ei lo dawng.

**MumbaiTuisunsuo Editorial Board ni lai mek Tv John K Dulian,Swamy BBDO-a Brand Associate ni zing chuh Senior Brand Associate a hla’ng kai a lo ni tah.MumbaiTuisunsuo chun a lawmpui chau ni lovin a suong em em hle anih.Chanchin ei hriet zawm pei danin,zirtawpni zan tarik 17th Oct 2008 khan Big Village tieng lawmna siemin, an hlimin inhawi an ti tla’ng hle thu ei lo dawng.

**Rohmingmawi(Andheri) khawm tuta kar chuh Dengue leiin Durga Hostipal-ah enkawl anih.Chanchin ei dong danin,vawisun Hospital-a inthawk thattieng pan ta leia in suoktir nieng atih.Chuong ang bawkin,ei tlangval David Reuben Khawbung khawm Dengue-a ringhla a ni leiin,Durga Hospital-a enkawl mek anih.

**Pastor Siesang le Tv Zoliensang Zote hai Union Biblical Seminary-a(UBS)theology inchuk mek hai chu 1st Semester chawl hmang malamin,Hmar Christian Fellowship Mumbai an mi hung kan.Abiekin Pastor Siesang lem hih chuh ser-le sang thil-ah rawngbawlna a nei nghal ding anih.

** Mumbai tlangval hlun le tulai-a Baroda tieng mi lo sai san tah Tv Jessai Pudaite khawm a di hlui Mumbai,Pune hai le football in khel ding chu poimaw hle a ngai-in,tuta kar nilaini 15th Oct 2008 khan Mumbai a lo hung chuong kai ve.

**Pu Darthangluoi,Manager;Sinate’s Creation chu a business le inzawmin tuta kar thawtanni 13th Oct 2008 kha an thuomhnaw design hai suklan dingin Delhi-ah a hang inzin.



TAWNGBAU LAKKHAWM

@@ ....tlangval threnkhat Mumbai an hunga..ei lawm hman vei leh..in ball pet hi chu..ka ngawk..ei beisei hai tak hlak hung leng hman lo hai....

Nk Esther Varte

@@ ....tlangval hai hih football pet pet ta naw ro..nghok in um..in ke a na po le a hmet dingin in mi hung pana... hung hun le hun naw khawm hrie lo cheu...

Nk Hmangaizuol(Daw’te)

@@....kailash.. kailash inti inti-a..iem a nih ka tia....ka zuk hriet chu a lo va ho lawm lawm...

Nk Jenny Hrangneimawi(Beautiful)

@@ ....in Tuisunsuo hih a hnar nei ka sawna...ka bachikhawm phun na-ah ka lo va sie a....tui an tlasam naw-a ding ka ti-a

Tv Carlos Lienlal(PG Warden,Boys Wing)

@@ ..Ka customer nu kuoma medium is large,large is medium ka zuk ti pek chuh a hriet thiem naw luot-in,a barakhai hle ie...

Nk Merina Zonuntlung(Powai Lanu)


TIRKO NI I NUOM AM?

Mani theina konga rong bawl dingin talen pekin ei um seng a, ei talen hmang dan le sukpung dan ruok chu inang naw nih. Chuonghai po po liengkoa a ruola innghat chu chanchin thra thè dar a nih. Misawnariin ei suok vong thei naw a, tirko le thuhriltu ei ni vong thei bok nawh. Amiruokchu, chuong po po inkop chu ni thei dan a um a, chu chu Baibul pek le sem dara rongbawl a nih.


Kum 2007 October khan Senvon-a Hmar Biel Thralaihai Inkhawmpuiah ka thrang ve a. Chu trum chun Baibul (Delhi Version) kawpi zakhat chuong, thrahnemngai le tlawmngai hai hung thawlawm chu kan sem a. A phek tontirah a petu hming le address kan ziek vong a, a dongtuhaiin an trongtrainaah hung hre zui dingin kan ngên bok a. Hi hmangaina thilpek hin sin a thaw nasa a, a hmaa Baibul tiem ngai lohai khomin tiem nuomna an nei pha el bakah an tiem leia piengtharna chang an pung pei ti tu chen hin thu kan dong sap pei a. Baibul thawlawmtuhai po po chungah Pathien hmingin lawmthu ka hril a, in lawmman chu vanah sie khawlin a um tah zing a nih ti ka hril bok cheu a nih.


October/November sung hin Hmar Biel-ah inzin nawk dingin Pathienin rem a mi ruotpek leiin, ka’n zin hmasaka ei lo tran tah, mani unauhai kuoma thilpek ropui inhlan kha sunzom thrain ka hriet a. Puo tienga ramthim ei invoi lai zingin eini sunga ramthim hi invoi zuol ngaiin kei chun ka hriet a. Ei chipuihai, mautam trâm le buoina hrang hrangin a tlakbuokhai hin sung ruol tak khom Baibul nei zo lo dam le a nei zohai khoma pakhat chauh intrawm an ni deu vong a nih. A dan ding taka chu, inring kêp thei a ni naw leiin puitling, lekha tiem thei chin chun mani Baibul ei nei seng ding a nih. A san chu ei hringna bu le ei ralthuom tak a ni lei a nih. Chun, mani tronga Baibul ei tiem hin ei hnam, ei sakhuo le ei trong a takin ei humhalin ei sukhmasawn pei a nih. Hi lekhabu huoisen tluka hnam damna le chawisangna intlun theitu lekhabu dang a um nawh.


Chuleiin, cheng zanga chauh senga ei unauhai kuomah fea sun le zana misawnari sin thaw nuomtu taphot chun in hming le address hung pe unla, in aiawin ka’n zin pha leh Baibul ka hung sem ding a nih. Cheng sangkhat thawtu chun misawnari pahni sin, singkhat thawtu chun sawmhni sin chawl loin a thaw thei a nih. Tuta ei dit chu a sum ni loin hming le address (hming ziek nuom dan) le thaw nuom zat a nih. Sum chu thla thum sunga pek thei a nih. Delhi puo tienga umhaiin sum an hung thon dan ding khom hung inhriettir ning an tih. Delhi-a um, sum pe nuom nghalhai chun Pu H.K.Kawllienthang amanih keima kuomah pek thei a nih.


Hi rongbawlnaa thrang nuom taphot chun ka e-mail keivom@rediffmail. com or l_keivom@yahoo. com, Phone 22757630, Mobile 9868213252 le H.K.Kawllienthang Mobile 9891232589/98993948 89 ah mi hung inhriettir dingin kan ngen cheu.

Ram le hnam le Kristaa inthrahnemngaipui

L.Keivom
C-408 Purvasha
Mayur Vihar-1
Delhi-110091
Phone:22757630; MB 9868213252


1 comment:

  1. In blog in update zing a lawm a um ie. Delhi hai hin an hung contribute rawn khop el. a tha anih. Mumbai hai khom ziek pei inla. Article haihi a ziektu hai kuoma mi hung ziek pek rawh in ti ani..or an ni'n an hung ti lem? A ieng ieng khom a tha vong tho.

    ReplyDelete