Sunday, December 28, 2008

Mumbai Tuisunsuo 28/12/08 Vol 1 Issue 18

KOKIR THEI NISIEN

Jim D. Gangte

Sap thuvar chun “TIME AND TIDE WAITS FOR NO MAN” a ti a. Hun le tuifawn in tukhawm a nghak nawh tina a nih.

Pathien thuoina zarin kumkhat (2008) chu ei lo hmang zo nawk el ding chu a ni hih. Khawsawt khawm a um hle. Kumthar beiseina nei inla khawm hun liem ta hnung ha’n ei lunglai a fang vawng vawngin, ngailai a suk zuol nawk hlak. Keikhawm ka hun liem ta hnung hai ka hang thlirkirin, lunglai a sukthar hle ie. Rewind thei nisien chuh, rewind a bula tan that vawng ka nuom. Pathiennin hun hlutak ami pek hai hrefu lovin ka lo khawral mei meia, ka harsuok hlak chun, muol an milo liemsan ta der el sia, kir zai an rel nawh.Insirin kum hai hi ei in thla liem pei ding a hawi ngei.

Kum 2008 ei thla liem mek hi hang thlirkir seng ei tiu. Mi thenkhat ta ding chun- Ei hlawling kum, ei hrat kum, ei hmasawn kum, ei ruol dittak hai leh ei intuok kum, ei Hmangaitak ei tawng kum, sungkima dar ang ei leng kum, kum ropui, kum inchik tlak tak ni ngei atih. Nisienlakhawm, mi thenkhat hai ta ding chun – Ei hlawsamna kum, ei chan kum, ei hriselnaw kum, ei khawsawt kum, thlarau le taksa rama ei tlaksiet kum, ei Hmangai tak hai ei the kum, kum rinum,Elijah anga Jenipar thing hnuoia “A hun ta ie, Aw Lalpa,, tuhin ka hringna hi la el ta….” ti a hun ei hmang kum khawm a ni el thei.

Ei khawvel hmu dan le hmang dan an ang naw ang bawkin, ei thiltuok (experience) an ang naw hle. Ieng po khawm lo nisien, thil pakhat a chieng em em chu- ‘Hun in ami nghak naw a, Hun liem ta hnung ei ko kir thei bawk nawh.

Tirko Paula chun Philippi 3:13-14 ah hieng hin a hril “ Amiruokchu hi thil pakhat hi ka thaw hlak- Hnung tienga thil um hai chu thei nghila, hmatienga thil um hai chu banin, Krista Isua Pathien chungtieng kona san lawman hmu dingin, tiemchin tieng chu ka pan tal tal anih.”

Ka Unau dittakhai, hun liem ta hnung a, ei thil tuok nataktak hai (bitter experience) hai ah ei cheng zing chun, ei ni le ei ni eiin hrem mei mei a nih. Hmatieng ei fe pei na dinga dodaltu(obstacle) a ni lem hlak.Anih, rinum tamtak ei tuok hai hi theinghil intak hle sienkhawm hmatieng beiseina ei nei ani chun thei nghil hram hram tum ei tiu. Mihriem hratna ringawt chun chuh dozo nawng ei tih, Pathien hratna a innghat in do lem ei tiu. Chuong ang bawk chun, Tirko Paula chun, hnungtienga thil um hai a ti hin, ei hun liem ta hnunga ei hlawtlingna hai (success) khawm ei theinghil a ngai anih, a tina anih. Ei thilthaw that,hlawtlingna hai ah ei cheng zing chun ei kal chawi peina dingah dodaltu an ni ve thei anih. Chapona’n ei sipa, Pathien ei thei nghila, atawp a tuoksiet ei tuok rawp hlak anih.

Hienghai popo lei hin 2008 kum khan iengpo lo tuok inla khawm , ko kir thei pakhat khawm ei nei nawh, a liem chu aliem ani ta a, theinghilin hmatieng 2009 beiseina lien tak leh Pathien Malsawmna dawngtu eini thei na dingin ei lungril ngaituona hai siemthar in a tha lem, a ropui lem beisei in fe pei ei tiu.

Kum 2009 a hin, eini ringtu hai ta ding lem chun WONDERFUL PROMISES in a mi hmuok a nih. Pathien thil intiem ropui taktak hai chu hmua dawngtu eini ngei theina dingin ka ditsakna insangtak kan hlan cheu. Pathienin Malsawmin thuoi pei raw sen cheu.

Kumthar Chibai

“ KEI MI HUNG KO LA, LO DAWN KA TI CHEU A, THIL ROPUITAK HAI INTAK TAK I HRIET NAW CHU INEN TIR KA TI CHE”….(JEREMIA 33:3)



RAM LE HNAM HMANGAINA

By.Rev.Kh.Thang Dailo

Tiemding: Luke 7:1-10

“…….A ma hi, hi hi i thawpek tlâk a nih. Ei hnam a hmangai a, kan inkhawmna in dâm a mi bawl pek a nih” an ta. (V 4-5).

Roman sipaizahotu siehlaw damnaw Isun a sukdam thu a hin chieng takin Pathien khoma ram le hnam hmangai hi a lawm ti hmu thei a nih. Sipaizahotu tir Juda upahai kha Isu kuoma an va fein a lo ngaipoimaw ngei dinga an ring leiin, “ei hnam a hmangaia” tiin a thilthra tawpêk hai an va hril a. Isu khoma a lo ngaipawimaw ni ding a na, an ni chu a zui nghal a ni kha.

Ram le hnam hmangai taka sin thawtu (Politicians, Govt.servants, NGO workers etc.) hai hi Pathien rongbawltu an nih. Amiruokchu tulai hin Pathien rongbawltu an ni zie an inhrietnaw lei le mipui khoma chuong ang chun ei ngai naw leiin ram le hnam a se deu deu niin an lang. Chuleichun hi thu hi ei ngaituo le thawthar a trul em em el. Ei Pathienthu bok chun, Thilthra thaw dinga Isu Krista a chun siema umin, a ma kutsuiok ei ni sia. Chu thilthra thaw chu ei umna dingin Pathienin a buotsai lawk a nih”(Ephesi 2:10) a tih a).

Ram le hnam hmangaitu chun a hnuoia thil hai hi ei hriet le thaw dinga thra niin an lang.

1- Pathienthu hi lien taka ei inhuoptir a trul a. Tulai trong taka social gospel / ministry an ti rongbawlna hi ei ramin ei trul em em. Samdamna (piengtharna) thu le ei Camp thaw hai chau ni lovin Social tieng rongbawlna hi ei uor a trul sa tah a nih.

2- Mihriem thaw dinga Pathienin a ruot hmasa tak chu thilsiem hai enkolna a nih. “Chun Lalpa Pathien chun mihriem chu a thruoi a, Eden huon enkol dingin a sie ta a”(Gen 2:15). Entirna dingin, Sorkar forest departmenta sinthawtu hai hin Pathiena an mawphurna an hriet naw leiin ei ram thing le ruo, boruok le ransa chenin ei sukse nasa a. A departmena thawktu hai hlakin hlaw lâkna chauvin an hmanga. Mani posting-na a um khom an um mumal noh. Tulai khawvelin harsatna a tuok le buoipui tak chu environmental problems a ni tah. Hi thil ringot khom hi missionary field pawimaw em em a nih.

3- Mani sin senga ringum taka thaw hi Pathien lawm zawng le ram le hnam ta dinga rawngbawlna ropui a nih. “Thilthra thaw dinga Isu Krista a chun siema umin, a ma kutsuiok ei ni sia. Chu thilthra thaw chu ei umna dingin Pathienin a buotsai lawk a nih”(Ephesi 2:10).

Thilthra thawna dinga Pathienin a mi siena hmun chu ei office le sinthawna seng hi a nih. Ringum taka i sin i thaw chun Pathien rongbawltu i nih.

Martin Luther(Reformer) chun hieng hin a hril a: “The maid servant who daily sweeps the kitchen does a good job as much as the priest who performs daily in the temple. Not because she sings Christian songs while sweeping but because God loves clean kitchen. And a cobbler is a good Christian not because he put cross sign in the shoes he made but because he made good shoes. God appreciates good craftsmanship and good products”.

Baroda 24/12/2008



CHANCHIN LAWRKHAWM

## MT Editorial Board Member le ei tlangval suong em em,,(a thang lova Sermu thur theilo,) James Daihmingthang chun Desk- top thar (Made in Baroda) alo nei ve bur tah.MT chun a thilthar nei hi a lawmpui hle.Tuisunsuo hnar suk hrattu hmangruoa anchangtir ngei ei beisei.Pathienni nawk inchawng a tum thu ei dawng bawk. Baroda hai Christmas Gift- exchange chu a tha bik hle.

## Pi Zairemsung le Nk. Lawmi hai chu an sin le inzawmin Goa tieng Krismas khom einilai hmang hman lovin an inzin. Ni iemani chen an cham ding ti thu ei lo dawng. Kum hlui inthlana le kum thar bek chu ei ni lai an hung thang hman ei beisei. Papui thenkhat sun inlo, zan meng lo khawpa khawsawt an um zeuzeu .

## Pu Darthangluoi le a sunghai chu Krismas hlimtaka Mumbai a an hmang zo hnungin Kumhlui inthlana le Kumthar hmang dingin zani khan Goa tieng an lo liem tah.Kumthar an zu tuok zovin tarik ni 3 hin Mumbai tieng an hung kir nawk beisei ani.

## Nk Lalengzam Joute le tlangval Bengdang hai chu zani khan Shillong tieng panin Amchi Mumbai anlo suok san ta.Anni hi kumthar January ni 8 hin Kohran dan thienghlimin kut- in-suina nei an ti.Nupa hlim thei tak hung ni ngei dingin MT chun a ditsakna anhlan.

## Tulai Mumbai boruok inthlak thleng leiin Hritlang, khawsik, luna, Sung khaw hri an leng nasa leiin mitin fak le dawng tieng panga fimkhur seng ei tiu.

Tuesday, December 23, 2008

Mumbai Tuisunsuo 21/12/08 Vol 1 Issue 17

KRISMAS THUCHA


Voisun hin in ta dingin David khuoah Sandamtu a pieng tah, Lal Krista chu” Lk. 2:11

Christopher Lalrothang

Kum sanghni chuongzet liemtah lai khan Rome hai’n khawvel pumpui chunga rorel tumin an Lalram zausap pei anlo tuma. Chuong hunlai chun an rampar(empire) pakhat, Jerusalem tuta Israel khawpui a khun khawvel Sandamtu ding Judai rama a hung pieng ding thu an lo hriet ve ta a. Chu naute danglam takel hung pieng ding chu khawsak tienga inthawka mi varhai chun chibai buk dingin Jerusalem khuoah chun an hunga(Mt 2:1). Khawsak mi varhai hung chu Jerusalem rorelna khawlpui le thuneina cheltu, Lal Herod-in alo hriet ruok chun dawha taka thawa naute chu that a tum el ta a. Naupasalte kumnhi hnuoi tieng po rawt chimit vawng a tum thu an suo a sienkhawm Pathienin rem alo ruot lawk sa ani leiin a thiltum a thlawn letder el ta a nih.

Awleh, tukum Krismas a ngaituo thar dinga nuom um tak chu Sandamtu eita dinga rinumtaka a hung pieng dan hriet chieng ngei. Krismas ei lo hmang hlak danhai a trulna ang peia bansan ding. Chu ding chun titakzeta ei lungril kawtkharhai hawnga Bethlehem tienga nghain hi a hnuoia thuchahai hi ngaituo thar tum ngei ei tiu.

Vanram Ropuina Maksanin(Fi 2:6&7): 6.”Ama chu Pathien anga uma, Pathien tluka um chu thil thlakhla ruola a ngai naw a, mihriemhai anga insiemin,7. Suok angin an siem a ama le ama an suktlawm ta lem a”. Vanram khawpui mawia Angel thiemhlimhai’n tawp intai umloa an inpak ngat ngatna rimawi chu eini mihriemhai suolna sawpfai dingin chu thil ieng malo ngaiin mihriemin a hung insiem ta lem a. Thuhriltu pakhatin a hril dan lem chun Krista Isu (Krista ti hi thlarau thienghlim tieng hrilna chun Isu tihi tisa thil tieng pang hrilna) ei suolhai intlengfai dinga a hung ding kha angelha’n mak anti leiin Pathien an inpak ri khawm chawmkhat chu a re thrup niin a hril nghe nghe. Chuongang khawpa ropui mi sandam dinga tlawm taka hung pieng hi ngaitha el chi an nawa a hlutna hi tukum Krismas hin hriet ngei tum seng ei tiu.

Mari le Josefa hai nupa beidawngna: Mi tamtak chun Pathien thlarau thienghlim inraitir ani leiin inhawi anti ding dam lo ring hlak mei ei tih. Ani teu teu le beidawngna kha tamtak tlu vang vanga an phur ani kha aw. Hi a hnuoia beidawngna le zakphakna tamtak an lo tuorhai hei en tih.


1. Pathien thutiem sukpuitling dinga mawphurna: Thutiem suk puitling hi thil harsa tawp el mitin i thaw theilo zawlneihai ngei khawm Pathien thutiem sukpuitling hi thil harsa ani ang hrimin a sukpuitlin thei an tam nawa sienkhawm Pathien chun a sukpui tling theitu ding ala ruot tho tho hlak anih. Josef khawm hin inruka mak el chu a tum a amiruokchu Lalpa Vantirko a kuoma hung inlarin nei trilo ding a hungin hriettir phing chun a hnar ngam ta nawa(Mt 1:19&20). Pathien thutiem an sukpuitlingna hin anni zarin khawvelin damna a dawng phaa eini hai chen khawm nupa tuokkhat ringumna leiin Mumbai khawpui kawr le vaihai leh thukhatin dar ang lengkhawmna’n ei hmang pha a ni hih. Ei ni thingbul lungpui bie hlak hnam anthawka Sandam hnam ei hung changna a hin ‘role’ pawimaw tak anlo play ani kha. Hi taka inthawk hin thuthiem sukpuitling a thrat zie chu inchuk ding thra takin ei zuk hmu thei nghal a nih.

2. Nunghak le Tlangval fel anthawka an hming siena: Khawtlang mipuiin nunghak le tlangval feltak nia an hril huoi huoi an innei hmaa nau lo hei vawn ngawt el chu hrilhai um hle’ng a tih. Aw tlangval I nuhmei huollai chuongang chun i hrietpuina thrang loin nau lo vawn el sien iem law tang i ta leh? Aw nang nunghak nunghak thienghlim ni siin I pasal huol hriet pui loin nau lo vawn la iem I law ding ana? Hi hi a pa chu ani tia patchawn a deng ding hlak chu an um awm si nawh. Beidawng um hle’ng a tih. Thirdam lakkir nawk el naw chu thaw ding vang ngawt a tih. Amiruokchu Pathien tri mi veve anni tlat leiin thlarau thienghlimin an raitir ti an hriet chieng hle a nih. Chuleiin Pathien thiltum le thilthaw hi hriet chieng a lova hei trul ngei de aw...

3. Nu le Pa mitmei vengna a’nthawkin: An nu an pahaiin naufel tawp tia anlo uongpui ve em em awm vei leh chuonga a ruoka nau anlo hei vawn el chu chanhai umtak chu ning a tih. Tulai nupuite bawp ruol ang bokin khang hunlai khawm khan lo inhrilse ve hlak ding chu anna maw. Nupui threnkhat lem chun, ‘nunghak inthieng nia in hril siin sawnnau dam a paia’, tiin lo hrilse ding chu anna. Chuonglai zing chun papuite bawp ruol hlak chun hnungtieng anthawkin, ‘perpawrin thlarau thienghlim inrai ka ni ala ti ta deu deu’ dam ti hlak naw ni ha’m.

4.Do le ral kara beidawngna: Mamngang taka beidawngna khawsung le laibung kara an tuor lai zing khawmin lo hmelma tu le that tumtu anlo um zing bawk. Herod hlak khan that tum phet phetin thu alo phierruok zing bawk. Nauhase inrik treu pumin tlung in khawm hmu zo loin ran bu pekna thlenga beidawngtakin nau chu an hei nei ta ngeia. Namenaloa rinum ding ani ti chu inhmai ruol an nawh. Iengpo khom nisien khawvel Sandamtu dinga Pathien ruot lawk ani tlat leiin dang ruol chu an nawh.

Krista Hmutuhai chu Lampui Dang an Hraw Hlak(Mt 2:12 le 2 Kor 5:17): Khawsak mivarha’n Bethlehem bawng inah Isu anva hmu hnung khan Pathienin an manga alo hril lawk ang takin lampui dang tieng an kir nawk ta a. Mi’n Krista an intuokpui ta chun an lampui hraw hlakhai bansanin a keibuoi thei dinghai lak anthawka insat thlain lampui dang an hraw ta lem hlak. Thil siemthar an hung nita a thi hluihai an bansanin a bo ta hlak a nih. Tu kum Krismas hin Bethlehema Sandamtu hung pieng ei hmu hnung hin ieng lampui am ana ei hraw ding chu ngunthluk tak le titakzetin ngaituo thar inla ti nuom a um tak zet.

Hmun tina tiem tuhai popo ditsakna vuochuom kan hlan seng cheu. Ei Krismas hmangna ding a hin iengkima iengkima chunghnungtaka Pathien ropuitakin (Lk 2:14)a um phawt chun hlawkna ropuitak chang ngei ngei ei tih.



TUOLSUNG CHANCHIN

#Mumbai Tuisunsuo Editorial Board Member Tv. Marc Lalrohlan le Pu Lalrothang Tusing hai nupa chu zani 20/12/08 khan Krismas hmang dingin Tuithaphai tieng an lo fe tung tah.Damtaka Mumbai an hung kir nawk hun ding MT in a nghakhla tak zet.

#Chuongang bawk chun Pu David Sinate hai sungkuo khawm zani 20/12/08 khan,Krismas le Kumthar hmang dingin Gauhati tieng an lo pan ve.

#Hun sawttak chawl hmang hnungin Nk.Hunlawmum Varte khawm a sinthawna RCCL zawm nawk dingin zirtawpni (19/12/08) zan khan Mumbai a lo suoksan nawk tah.Tlangval thenkhat khuosawt pawl an um niin thu eilo dawng.

#Pi Sari Tusing chun sinthawthrat leia lawmman in Multi-media Speaker 2000W a dawng.A lawmman dawng hi MT chun a lawmpui takzet.

#Hun sawttak anlo inzui ta hnungin Tv. Jacob Shakum chun, kumtluonga thre talo dingin a hmangaitak Nk. Merina Zonuntluong chu ni 13/12/08 khan alo thruoi bur tah.MT chun Kristien sungkuo ditumtak an hung indin ngei a nuompui hle.Inneina hi malsawmin um raw seh.

#Nk Sylvia Sangnunmawi khawm Tuithaphai a chawl tawite a va hmang hnungin Mumbai ah Krismas hmang dingin damtakin alo hung tlung nawk tah.Ama ruol hin anaunu (Niece) Brenda Lawmnakim a hung ve.



Ms MHWA 2008 le MumbaiTuisunsuo inpawl tlangna

Tarik 6th Dec. 2008 a MHWA huoihawtna hnuoia Annual Meet hmangnaa Miss MHWA 2008 dinga thlangtling Nk Monica Lalneivar le MumbaiTuisunsuo editorial board hai hun remchang hmasataka an inpawlna chu hi a hnuoi ang hi a nih

Monica Lalneivar-ML MumbaiTuisunsuo-MT

MT: I hming hi tu phuok am? A umzie mi hril pek the ii tie?

ML: Monica ti po hi ka papui a I phuok ana chun Lalneivar ti po hi ka nupuiin ami phuok pek a nih. Ka hming umzie tak chu Lalpa nei tuhai chu an var hlak (mi’n anni anthawkin var an hmu thei hlak) leiin Lalneivar tiin an mi phuok a nih.

MT: Mumbai-a I hung nasantak mi hril thei I tie?

ML: Khawsakna inhawi lem beiseia Churachandpur a’nthawka hung ka nih.

MT: Mumbai boruok hi ieng tin am I ngai a?

ML: Rawsur nasa taluo leia tuilet vetkha chu pawia ka sak bar nawh. A lum hi ka nghoka chun boruok hi a khu bawk leiin hung hlim lai lem khan chu a ‘adjust’ intak kati khawp el. Chun a tawp taka dingin khawvel hriet khawpa mipui tam hi nghawk a um chungchuong, fe na na in hneng tawn tawn hi chu ningtel a sukum thei khawp el.

MT: Mumbai tlangval a hung leng hlak tuhai che hi teh?

ML: An fel eh(he he heh), mi biek an thiema chun an theina zawng zawnga mi thrangpui an inhuom vawng hlaka hnam thil an ngaisang bawk lei hin ngainat an um. Ka damnaw laia ngaina taka mi hung kantu tlangval/ tlangvals lem kha chu ka ngaina rieu anih.

MT: I pasal ditzawng ieng ang mi’m a na?

ML: Dung insang deu met, thau bek lo cher taluo bek bek lo, mi duot thiem deu, Kristen sungkuo thratak indin pui thei ding, Mani sinthawna ringum taka thaw fan fan mi le hnam ngaisang. Romantic bek bek chu trulin ka hriet hranpa naw ie.

MT: Mr MHWA ’08 kha a U lem nisien I ti nasan kha mi hrilfie pek thei I tie?

ML: (Innui deusatin) kan dung an hme lem char ding a na....... Ama khawm alo in ‘hope’ deu bawks..... he he hehe

MT: MT website-a I thlalak lo en tuha’n ngaino a bei an ti che a

ML: Mi tamtakin changal hme lei a pangti thralo ani nuom vieu an ti hlaka kei chun sathu-changal hme le hmebut ka hme rawn leia pangti thra le ngaino bei niin kan hriet ve tlat a nih.

MT: Mumbai a hin iengtin am ei hnam sukmawi thei zing ei ta?

ML: A pawimaw tak chu hun vawng dik, inthuruolna, nungchang thra a nih. Chun Pathienni ei inkhawm chang hin ei hnam puonhai a thei hram chun ei nei ang ang hai bie hlak inla chun tlangvalhai khawm Fellowship le Welfare thilthawna taphawta tlawmngaina hi vawng zing hlakhai sien.

MT: MumbaiTuisunsuo hi iengtin am I ngai a?

ML: Ka ngaisang tawp. Ei hlimna pakhat ana. Tuolsung chanchin kimchang takin kartawp zatin hriet theiin a um zie hlaka chun inkhawm trien chara tiem thei nghala a um leiin inkhawm trien a sukhoi pha sawt.

Sunday, December 14, 2008

Mumbai Tuisunsuo 14/12/08 Vol 1 Issue 16

INKAPNA RAPTHLAK

Expeienced by Darthangluoi Sinate&Family, Colaba.

November 26th thimbut chu nidang ang bawkin kan chengna Coloba kawt thlerhai chu an luna. Motor tlan vel le mipui inzi nuoi nuoihai hei en chun, zantin a thil umdan pangngai a ni leiin ngai a suk muong hle a. Inkapna rapthlak takin Coloba chu a hmasawng zing a nih ti chu tu khawma an ring phak naw a nih.

Chu zan chun, Nk Ruthy Lalsanhim le a rawihai khawm Freshers’cum Annual Meet 08 ding le inzawmin an hung leng a.Thuom hnaw Fashion show- na a ding design thar hai kan buoipui thei ang angina kan buoipui mup mup a; kan buoi tlang hle a nih. Chun, an inlawina ding a hlat leiin, inhma deu hlekin bu kan fak a, zan dar 9 inrik vel chun Kalina tienga kir nawk dingin an insiem sau sau tawl a.

Chuonglai tak chun, thil puok ri kan hriet tan a. Kei chun silai/bomb ri ni dingin ka ring nawh. Asanchu, vaihai hin molawm/ thil lawm annei pha leh bomb(cracker) an raw hlaka, chuong ang ri mei mei ni dingin ka ring lem a. Chuong lai ran chun, tuta tuma thil ri hi chu danglam biek rieu na anei in ka hriet tlat thung a; hril suok mang lo chun ka lungrilah ka vawn zing a. Sawt nawte a chun, mihriem rihau a hung dang deu deua; thawmri mak danglam takin a hung zui peia . Chu zet chun, kan ngai a tha ta naw hle a nih. Thil um dan hrie chieng nuom in kan balcony a’nthawkin tuol ka zuk thlir a. Mipui hmatieng in tawl huma, hnung tawl kir nawk huou pei ka zuk hmu thei a. Vengbuk le vengbuk an insuk buoi rek a ni awm ti ngai in ka ngai ta mei mei a. Chuong lai zing chun, kan insak el a petrol pump lai bomb hratpa a hung puok ta rum rum el a. Mihriem tlan dar uoi uoi hai chu ka zuk en zing a.Thla bar taka in virbuoi hai dam chu ka zuk hmu theia,a then lem chu bawk hip ngawi ngawi dam le in kei bata inbuoipui mawl mawl dam an ni a; lungril chu a hamhai thlak hle a nih. Kan in lenghai laia nunghak pakhat khawm chu In kila lo intawm in, alo in thin hlawp hlawp a,kei chun ka thei ang angina, tit ding aum nawzie thu ka hei hril a. Edlyn nu lem chu a ti khawp el a, a ti zuol deu pha balcony tienga inthawkin mipui pung khawm hai chu a zuk bi dek dek hlaka an la um chun a thla a hung muong huoi hlak a ni.

Kei hi mi hawdak ve tak ka ni a. Zu suoka, ieng thil am a thlung ti hriet chu ka nuom khawp el a nih. Ka sung hai rem ti rak nawsa’n arukin kan rel dawk ta tho thoa, mipui lai chun hohlim bum na na a ka na ka va daw a .Chuong chun helpawl mi pahni in kan hmel hriet(Kan in kawllai um) a restaurant (Leopold Café) chu kawt khar ain thawk in a sunga bufahai chu in dawi na thang thak lo in AK 56 in magazine pahni in ruok thakin an thut khum thu ka dawng ta a. Hi hel pawlhai hi an zam naw hmel khawp el, asanchu police hai khawmin an paw ngam meu naw ni awm ani. Chun Kan um na bul el a Jews Centre, Nariman House (NH) khawm helpawlhai in an capture thu ka hriet nawk pei a. Chuong lai zing chun hi NH a inthawk hi hand granade le silai in mipui pung khawm hai chu an hung tawng ve zing a. Mipui hai hlak chu lam thuom tinah an in hnaw bita, tin zai reng rel an um nuom bik naw a, khuo an var zak ani.

Ni 27 Nov.zing khuo ahung var a, commando hai chun NH an in huol a, fim khur takin thang hmun an khaw a Hostage- hai tawk sa pal ilau na lien tak an neileiin an chang muong hle a nih. Chuong chun nisa ahung tla nawk ta a. Zanrillai beipui an thlak ding ani thu kan hriet a, zan hung tlung ding chu huphur aum hle a ni ringawt el a nih. Mi thenkhat mi ngaituotuhai in an In tieng in thirr fihlim dinga an mi ko an um zing bawk leh, kan In chu suok san el dingin kan in suk thluk thawk khata ta a. Thurawn tawpna dingin kan building a um ve Army Officer pakhat kan hei rawn a ,ama chun damte a, fimkhur taka bei an tum thu ami hrila, chuphing leh, suok lo ding in kan in sukthluk nawk talem a nih.

Kei le ka nau nu a naupang lem(Elsie) chu kan ti bek khawm in ka hriet naw, A puok in ring deu chun ka naunu aupalem(Edlyn) le anu hi an buoi sie tum el ana,chulei chu lungril a sawl deu khawp ela.Chuong chun lungril himaw tak puma ieng tinam/tikam an bei ding ti ka suong tuo neu neu lai chun, Ni 28 Nov zing dar 6 vel in chung tieng a inthawkin thli pui le ri nasatakin NH chung zawnlai chun ahung uma. ka hei ngha vel chun, Helicopter in ding chur chur a commando hru ia in khai thla zar zarhai chu ka hang hmu thei a. Chuong lai tak chun bomb le silai in nasa tawk takin helpawl hai, nikhat zen zawn thang hmun lo rem ta hai chu, commando-hai chun an beia. Nisienlakhawm, lungthawng khawpa silai le bomb ri hriet ding aum naw. Asanchu helicopter ri a nasat em lei a nih. Tu ta tum a helicopter ri hi, amawi ka ti tum tak niin ka hriet nghe nghe a nih. Chu le in zawm chun hieng hin ka ngai tuo a, Edlyn hin thil ri a ti lei ni loin, silai le bomb ri hi mi hring na lak na ahmang a nih ti a hriet leiin, a lungril a na alo ni lem an awm a. Silai le bomb an ri pha a awm a hip chawi chawi hlak a, amiruokchu helicopter ri ruok chun a suk buoi nawh a nih.

Iemani chen an inbei hnung chun kan door bell a hung in ri kang kang a, toilet-a ka um kar a nih. Edlyn nu’n lungril in kak tak pumin kawt chu a va bi dek dek a, a va hawng chun Commando hliem an uma thu le Doctor first aid petu ding an mamawzie thu an hung hril a. Edlyn nu chun cotton le bandage iemani zat a lo inchawitir a. Hung insiema hung dingin a hrila, an phone no. a lak bawk a nih. Chuonga min an mi mamaw chu tiin an rang thei angin kan insiem sawk sawk a, hliemna tuor chu thei ang anga zu bawisawm dingin kan suok ta a. Amiruokchu hospital tieng an lo phur hman ta leiin kan hung kir nawk nghal a .Kan mamaw chun hung ko nawk kan che an ti lei in kan inring deu zing a.

Kei le Elsie chu an khat tawkin mipui lai kan zu fe a, a chang leh In chung anthawk kan zuk thlir a, top floor anthawk a suk zawnga a Bu a ang thlapa commando-hai an hang che vel chu, a takin ei hmu zen zen ngai naw leiin hmu nuom chu an um tho chu ning ati. Cinema khawm a hawi kawng khat vieu in ka hriet .Chuong lai a lungrila lien tak chu an I char de hai an dam dim ti hi a nih. Jews family hai nau, kum hni mi chau chu an Maid in a hung in rel dawk puia, a nu le pa iem an chang ti ruok chu mipui hai lungril kamtu tak laia pakhat a nih.

Sun nithlak anin bei a, zan dar 8 vel chun commando-hai chun top floor a inthawk an pal tlang thei cho a, chu chun hnena an chang a suk chieng chau a nih. Chu le in ruol chun mipui “Barat ki mata ji jai” ti a khet thuop thuop ri kan zuk hriet thei a. Kan ha a dam huoi huoi. Amiruok chu kei chu ka hlim na afam kim thei chuong naw, asanchu naute (nu le pa’n an thi san ) chun ka lungril a fak hle ri ngawt el a. Ka nauhai ka hei inchan sin a, ka ngaituo a suk sei zuol ting el a nih.

Chuong chun , silai ri le bomb ri hai a hung re ta pei a ka naunu Edlyn le a nu khawm an hmel a hung in ang deu deu peia ta a. Pathien kuoma lawm thu hrilna kan nei a, pangai kan hung aw tawl nawk ta pei a nih.

Hi Tuisusuo hmang in, mi lo tawngtai pek le phone cal l (thla huol) hung thawtu hai po po chunga kan lawmthu kan hung hril a nih. Pathien in akut hrat in veng zing raw sen cheu.


CHANCHIN LAWRKHAWM

## Welfare member Tv Kaprosang Joute chu tarik ni 17,December 2008 hin WMEC biekin Rengkai, CC Pur ah Dr.Olivia Fimlalkim leh Kohran dan thienghlim-in,Pastor hma-a kut insuina nei an tih. Chuongang bawkin Nk Zohmingsang Khawbung khawmin 20th December 2008 khin EFCI biekin Shillong-ah Capt Crossmawi L Hmar le kut insuina nei an tih. MT chun Kristien suongkuo thratak indin dingin ditsakna an hlan ve ve.

## Mumbai nghak upa Nk Hunlawmum Varte le nghaklakte threnkhat chu hun awl hmang trangkai a thrat zie in entirna'n Surat-a 'Catering' a rawngbawlin an fe.

## Ei Editorial Board Member Pu Lalthakhum Khawbung chu vawisun Intelligent Bureau Examination 2008 a pek. Chuongang bawkin Pu Lalrothang Tusing khawm Tax Assistant Examination 2008 exam a pek. MT chun hlawtlingna dawng veve dingin ditsakna an hlan.

## Kum tawp ei hnaia veng fe ding mi tamtak an in puocha mup mup. Ei hriet chena chu zani lai khan mi thrahnem tawk tak el chun Mumbai suoksanin chawl hmang dingin veng tieng an lo fe tah. Train station-a mi inthlaa fehai lem chun an hungkir tieng mithi tra ang elin an mithli a parawl kieng el

## Ruthi Lalsanhim chun sinthawna thralem hmuin 12th December 2008 Zirtawpni khan Dubai panin Mumbai alo suoksan tah. MT chun a sinthar hmu hi a lawmpui hlea chu ruol ruol chun tlung taka a sinthawna hlawtling ngei dingin ditsakna an hlan nghal.

## Tuta kar chu Mumbai hmun hran hrana ei Annual Meet hmangna thu veng fe ding chanchinin hmun a hluo rawn hle. Chuonglai zing chun Fellowship chun Krismas hmang dan ding a ngaituo meka. Thu chieng lem la um naw sienkhawm Powai tieng Krismas hmang dinga in singsa mek a nih.

## Thu vuongva eilo dawng danin mi tamtak chawl le Krismas hmang dinga veng tieng an fe leiin khawsawt Gurup indin niin chanchin eilo dawng. Hi gurup hi Unofficial ni de sienkhawm an President chu Tv Jacob Shakum, Secy John Sanate, Fin Secy Nk Singlienkhawl, Tresurer Lalruotkim le Musical Secy. James Lalkhumsang an nih. Mi dang po chu lifetime member a ruot an nih.


TRONGBAU

## Ei Annual Meet ni-a freshers hai stage a an ko khan Nemzahat khat stage tieng pan nekin,Tuol tieng a suok vung vung,stage hi a hmusuol am ani aw ka lo tia,stage um na tieng ka kawkhmu khom khan pan tum chuong,ieng stage am a hmu anih..
Tv Joseph Joute

## Freshers meet ei thaw hi January a thaw ding an tah.Freshers hai an lo champ hman taluo ta-a,rag nek nek in,an ni'n an mi rak lem naw chau anih,Jacob lem chu trit khom a ti ngam nawh
Pu Stephan C Hmar

## Ana... top-5 a ka thrang phak reng reng kha chu,Miss title lak nek khomin ropui lemin kan hriet...a miss nu khom tu mi dang ni chuong lova...inher dan ding le trongdan ding zan tina kanchuktir sa vawng..
Nk Ruthi Khawbung

##Freshers' Meet khan chu, kei ni ruolcham kha chu 3rd session kha chu kan zo ta hlawl ta naw ding leiin kan lovin lawi el anih. Kum hai khom in a lo zir ta a,thrangthar hai angin ei tha khom in za zawk zawk ta lova..

Nk Hunlawmum(The Veteran)

Sunday, December 7, 2008

Mumbai Tuisunsuo 07/12/08 Vol 1 Issue 15


MHWA, Fresher’s-cum-Annual Meet 2008 Thlirkirna


Some days are better than the others. And there are days you never wanted them to end.

-Hillary Rodham Clinton

Hun kha le chen anthawka ei lo tung em em ei Annual meet chu zani khan Indian Airlines Colony , Kalina Santacruz hmuna hmang a lo ni tah. Hi ei Annual Meet hi mipui 150 vel fe khawmin inhawi le ropui taka hmang a nih. Hi Annual Meet a hin Pu Franklin L Khawbung Khuollien a thrangin,an nu Pi Lalnunsiem leh Surat,Gujarat anthawkin an hung hung thrang.

Hun hawngna’n Aw Kan Sinlung Khawpui Chulhnung,Dar ang Lengna mipuiin sakin,rimawi chi tum tum keyboard,electric/Acoustic guitar le hla thruoi thiem,rawlthra le zei Tv Lalkhumsang,Nk Zari leNk.Ruth Keivom haiin hla hung thruoiin;a hla hmasa tak na a khom a boruok chu an sang tran nghal ta anih.Awleh hienga,hall tienga mipui nal fahran a hnam thuoma incheia hla ruoi a an hlim tran ta lai hin,Mister Mumbai 2008 intlhlangna-a top 5 a thrang phak ve ngat Tv Lathasang(ngaina taka Sangbai annawleh Sang-ga ti a ko) le a ruol hai ,tlangval hawn khat hai chu Mumbai nisa lum tak le meipui i hliu pup pup na hnuoi-a le Airlines Colony-a Jentail hnam,saktieng(Orient) mi la hmu ngailo baka, khawvel a taw’p trep ta hnung khoma sa lan tem lo hai mit tamtak thlir tuou na hnuoi-a,tlawmngai chungchuong in suo-in,thlai rawng an bawl zing bok.Thlairawng mi bawl pek hai hi ngaisang an um em ema,tlangval piengthiem le inkhaithli vawng ni bawk,hieng ni khuo-a,lanu hai leh hlimte-a hun hmang ding hunthra-Laltuoklieng trongbau taka-sira hnawlin,rim inhnik in nam ta nek nek a,thlan saphul kai-a rawng an bawl na hi nunghak hai khan a biekin theinghil ngai naw’ng ei tiu!

Khuollien hai nupa chawimawina Nk Jenny Hrangneimawi-in par-hlawm inhlanna a nei zovin Pu Lalramthang Amo-in Freshers cum Annual Meet 2008 hawngna le inhlanna trawngtaina a nei zawm nghal bawk.Pu Darzakhum Songate,Welfare Chairman a inthawkin mipui a pungkhawm le khuolthra hai lawmlutna thucha hrilin,MHWA Directory mipui hmaah tlangzarna a nei zui nghala.Chairman Pu Darzakhum Songate hin,lawmlutna thucha a hri le inruol hin tulai Mumbai-ah Hmar nau hai ei pung pei el baka tulai hnai el a Mumbai thiltlung le inzawm a,ei ni Mumbai-a Hmar nau hai khawm inring ve zie le thi le mang ang tuok huna,bahrakhai taluo naw na dinga,a lungrila a lo phan MHWA Insurance Scheme chu a suklang bawk.Hi scheme thiltum tak chu siet,thi le mang ang tuok huna sum le pai a into del anih.Chu ding chun member tin in Rs. 500/- pei dawl dinga riruong anih.Prokram hmasuon peiin, Mumbai-a Hmarnau lekha inchukna kawnga hlawtlingna chang tuhai chawimawina Certificate Pu David Sinate-General Manager EXIM Bank-inhlanna a nei a.Hi zo le inruol hin Pu Darthangluoi Sinate le a ruolhai anthawkin hla mawi takel ngaithlakna nei a nih. An hlasak an thiemin ngai nuom a um hle-a; chun mipui hla khuoihnaang ngai-a inthrung thrup hai chu an zaihla rimawi hin an awi hne hle. Mawi le thiem taluo ringawt el Hnam Lam, Ruthi Lalsanhim le a ruolhai a inthawk-in pahni in entir a ni-a, a mipui mit a tlai hle.Doordarshan Kendra Imphal a lo inlang zak zak phak an ni ang reng bawkin, an thiem inruolin an chungchuon takzet a nih.Chuonga mipui hai, taksa rama um an nih ti intheinghil tir deu thaw-a zai-hla le lam mawi taka,lemder anni chu huntawk lova ngai-in,Pune nunghak Ruth Keivom in malzai,rimawi chikima a zuiin mipui hai chu a zuk zaihnem zawm nawk nghala.Chunga hla tienga an hmin el tieng lai-a,MHWA Secy in annual Report a hung pek khawm chu,zai hla sawna ban vai tum pawl kawm an bo nawh.

Zaihla le lam a in lemder chu huntawk a ngaiin,thutak le thilpoimawi hunser hung tlung in,MHWA Secy le Finance Secy hai in inmu trak, facts ,number le data haiin,Welfare hmalakna le sum-le -pai tieng an enkawldan an hung tarlang bawka.

Mumbai thil ngot ngot chun a bu a kim thei naw ding a nih hre zingin,Surat,Gujarat a inthawk-a Khuollien Pu Franklin Lalsansuok,IFS(Indian Forest Service) chun a hun hlutak peka a um chu hung suk puitlingin,Mumbai-a Hmar nau hai 2006 lai-a an hmalakna chu thra a ti le a lawmzie hai hrilin le Welfare thupui INTHURUOLA KAWLCHAWIIN ti, kha ni-a hmuthei khawpa an lang zie hai hril in, infuina thucha, abiekin thralai hai ta dingin a tarlang bawk.Thralai hai tumru a trul zie le an vanglaini le thratlaini Mumbai-a an hmang sung hin a hlawk thei dan taka hmang dinga a hun a suktawp lai zing hin,mi poimaw hieng Rockstar Van Halen,John Lennon le US President Elect 2008 Barack Obama hai chu thralai hai chau(challenge) na ding in a tarlang in a thucha suktawp.

Prokram tawp tieng hnai ta-in,Pune a inthok a Mumbai HmarWelfare Association election huoihawt dinga hung Joseph Lalruotsang Joute an rawina hnuoi-a election hi tran nghal anih.Mumbai HmarWelfare Association Office bearers dinga thlangtling hai Jim D Gangte in trongtraina a nei pek zo hin,1st session chu suktawp anih.

Refeshment hun tawite nei zo a ni hnungin, 2nd session hi tran nghal ani a.A bul a inthawkin a boruok an sang tran nghal a.Lam,hlasak le Fashion Show hai chu mipui khek ri in a bawzui pei bawk.Irene &Co.,Nemzahat & Co. le Irose & Co hai-a inthawk in lam chi tum tum in entir ani bawk.Prokram sukphuisui nawk dingin Sinate’s Creation a inthawkin thrui chei,nunghak piengnal le zei tak tak hai-a inthawk in fashion show an hang nei meu lem chu hall ri in van a ur ti ang el kha nih.MumbaiTuisunsuo Editorial Board a inthawkin Gurup song ngaithlak ani zova Nk Zari in Singlung Star hla a hang sak meu chu,meipui a thautui bur sa ang el in, mi tinin an thrungna a inthawka in chawm thovin an lo zui thrup thruop el chu,tawp ta lova zankhuo var chu an chau hle anih.Hun tawp hung hnai ta in,Mr & Miss inthlangna in a zawm nghal a,Tv Jessai Lalmalsawm Pudaite le Nk Monika Lalneivar hai chu Mr &Miss Mumbai Hmar 2008 a thlang tling an anih.

Ruoi thre in zawm nghal in,thil dang reng chu thei nghil hmak in,ruoithre suong chu bu le hme inhnik zie ngot in hohlimna a la’n ta lema,thlai suong hai hming chu an lar hrat nuom hle.

Zan dar 10 hung hnai ta-in,hall hai khawm khar hung hnai ta sien la khawm,thralai hawnkhat Darza le David Sinate hai inrawina hnuoia,hla ruoi la thre in,a tumtiek ding reng an phal nawh.Inthuruola Kalchawi pei dinga inpuocha in,ni za tam tak a liem hnungin hieng ang ni hih khuonu in a hung her dok nawk chau ding anih ti hre ngoi ngoi in,sakhmela mithli thla deu thaw in,”trin ta rei aw” ti in an lovin thre dar ta nih.

TRONGBAU

##Mister tak kha chu kei kana,anachu ka sang a hungna a hla el baka,a naupang lem, ka lan ken phot anih.
Tv James Daihmingthang

## Khawvela poitak chu Adam le Evi in theira faklo ding an fak kha ana,a dawta chu zani Annual meet thrang thei lova ka dam naw kha anih.Ana chu ka thlarau le phone chun ka hung tharng zing tho…..
Ms Nunthieng

##Miss ka ni tah..khovela hin iengkim an dik vong ta....eh!!!..to rawh...Mr khah a upa lem nisien chu aw...??
Nk Monica Lalneivar(Miss Mumbai Hmar 2008,Miss Konica Smile)

## Mister title inhlana ka um kha chu ka lawm lai zingin kan phalamna an sang lemin ka hriet..phu em em hieng Lalthasang (Sangbai) hai dam an um zing lai,an hma bula a title in mi hangin hlan nawk nghal..ka awr ngam naw deu thaw anih..bu khawm khah ka fak vat naw reng anih
Tv Jessai Lalmalsawm Pudaite (Mr Mumbai Hmar 2008.From Baroda with Love)

##Nuhmei nei hi keima tieng taka lan pei zan naw lang khawm,leilung le lottery hai chen hin ka trul zie chu an mi hriet puiiin ,an mi thrang pui chu anih.Dinner Set hang man reng reng khawm kha a umzie an thuk anih.Khuanu ruat lo D kha chu sira hnawlin,nuhmei khawm hi lottery a thaw el chi am an ta...Sangbai??
Tv Jacob L Shakum(The Lottery man)

## Function ei nei nawk pha pha chu,a hun taka ei tran thei naw chun,trin vawng nghal ding,U Luoi,Rama le U David lovin ngir tir ka ta, a hung in hnu hnu an mong tam ka lovin zep tir pei ding...(Chomkhat hnung-in a hungin nui)
Pu Darzakhum Sonagte

MHWA 2009-10 THRUOITUHAI

Chairman: Pu.Darzakhum Songate

Vice-Chairman: Tv. Marc Lalrohlan

Secretary: Pu.Stephan C Hmar

Assistant Secy: Tv.John K Dulian

Secy. Information: Tv.James Daihmingthang

Secy. Finance: Pu.Lalthakhum Khawbung(Buonga)