Tuesday, July 28, 2009

Mumbai Tuisunsuo 26July-09 Vol 1 Issue 43

Banra-Worli Sea Link

-Pastor Lalsiesang

Mumbai Hmar zaleng nau lenglai, tlangval kei kan nawm ti-ngam thral, zankhat thilthua pa chang chang thei thral. An group hminga khawm Lenglai Gurup ngat hai leh, tarik ni sawm zan (zirtawp zan) late night show ang deuin Bible study kan neia, hitaka kan study chu Tirko Paula lekhathawn Rome bung khatna anih. Kan ringnekin inhawi kan tih, ti chuh sinlung house neitu Lenglai John K Dulian @ La lal or Lal Bhaiin hieng hin a hril: “Ahmaa ka Bible hriet po po dehawn ka ta, tuta ka hriet hai chau hi kan khawl ding an tah” tiin. Inhawi kan ti chau niloin kan zawngsak vieu khawm a hawi. A thlarau a thawk hin chuh mihriem hin peinaw tak tak ei lo nei nawh. Bible dittawka kan study zo, ei khuo tieng nisien chuh vawikhat leng hnawtdawk arkhuong ding velin, tulai khawvel a bikin India rama cheng mitinin an hmu inhawk le Newspaper hai khawma an ziek nghawklo, a hming ding ringawt khawm hrilhlaw em em el, Worli Bandra sea link Arabian tuipui chunga Worli le Bandra inkara leilak indaw kilo metre 5 vela sei, Pi Sonia Gandhiin a hawng thar hlawk chunga tlan dingin, Lenglai Marc @ Marka a i10 (car) ngatin, Lenglai hai: Joseph Joute, Jo Songate, Lalal, Marc hai leh chun kan lan thawk dawk nawk anih. Anni Lenglai Gurup nasat em emna pakhat chuh, sana (watch) hmawlte invirkuol hin an thawnuom le an nunghak leng nuom lengna dingin, ro a rel naw reng reng nisien a hawi. Nuhmei an nei pha an nuhmei hai invirkuol velbekin umzie nei ta awmtak ana. Lenglai La lal leh a front seat kan inthrunga, a hnung tieng Lenglai Jo, Josheph le Marc an inthrung, car pakhata thrung kan na chuh, kan thil ngaituo ruok chu a dang vieu ka ring. Zan sawt hnunga ruosur zo, khawpui boruok inthiengtak leh tuipui chunga electric eng-inzamchiei hnuoia cara hang tlan chuh, lenglai lungril ding le duthusam ding chu hril kher ngailoin a awm ding chu ngairuot thei anih.

Chounga leilak chunga kan tlan lai chun ka ngaituonaa chun, pa le pa inthlau zie dam, mihriem khawsakna inthlau zie, kum nga (five years) vel liemtaa Hmarkhawlien khawsunga ka leilak hraw le tuta kan tlan zingna leilak in thlau zie, Mumbai khawpui le Taithu khuo inthlau zie ka lungrila chun a hung lut truk truka, ngaituona a sei nuom khawpel. Chuonga ngaituona rama ka leng zing lai chun, ringnaw karin leilak chu kan lo tlan suok der el taa, leilak chu la zuk thlir ka nuom khawpela, ka lungril anhriet am mani ding, ka ruol hai chun tuipui kama la chawla leilak chu la thlir ding tiin car chu an suk chawla, thrung pumin leilak mawi em em chu kan thlira. Mihriem hi thil hmu in-ang seng seng ei ngaituon le ei hmu dan an-angnaw ding zie chuh. Tupui kama inthawk chun, tuipui inthuk tak chunga leilak indaw sei em em el ka zuk en chuh, thil dang dang nekin a leilak ban (pillar) an phun dan ding mawl chun ka ngaituona a laka. Anphun dan ding reng ka ngaituo suok thei nawh, ka ruol hai chu kan dawna, tupui inthuk tak sunga ban (pillar) tamtak det em ema an zuk phun el chu ka hriet thiemnan a phaknaw a ni deu tak. Ramtin ka ngaituoa leilak ban (pillar)pakhat hi, Mumbai Hmar Welfare Association hai phun dingin mi hung ti el ta hai sien, ei buoi ding zie chu hril ngaina a um nawh, ei Chairman threnlo Pu Dazakhum Songate a lu inhai ding zie dam ka ngaituoa. Phunloin ei pam thrul el ka ring. Tupui inthuk tak sunga ban(pillar) det em ema inphum chun ka ngaituona a hluoa, hriet thiem ka nuoma, ringnekin a mi suk buoi khawpel. A Pathien remruot ruotin tarik ni 19 chawlni inkhawm trinin, lenglai Joseph Joute leh threnlo Pu Darzakhuma a inah kan zu lenga, titi lengkhawm ang deua kan ti ti lai chun, discovery channel television ah chun leilak tuipui chunga andaw dan chu an hung showah. Ka sangpa lenglai Joseph Joute chun ka buoina chu a lo hriet zing niding ana,U Siesang en rawh sawh tuipui sunga leilak ban (pillar) anphun dan sawh tin a mi kawk hmua, ka zuk en luo chuh khawl (machine) hmanga harsa bekloa an phun hi a lo ni zinga, ka ringnekin a lo intaknaw hmel khawpel. Mumbai Hmar Welfare Association khawmin ei phun thei ka ring ta chuh tie. Tuipui sunga leilak ban (pillar) phun danin a mi suk buoi ta nawh. Chu nekin thil hrim hrim ei hrietnaw leia, ei buoina hih a tam ding zie ka hung hriet suok pha ta a nih. Worli Bandra sea-link leilak tuipui sung inthuk taka ban det em ema anphum ka ngaituo ang hin. Van ram le leihnuoi inkara ringna leilak ban (pillar) iengtinnam det em em in khawvel sunga hin ei phuna ? A tlangpuiin ei hnam hin ringna leilak ban (pillar) ei phun dan hi ngaituo um khawp anih. Crusade le campa phun det tumna lungril hin ei sip deu nisien a hawi, ei kohran sunga hai khawm hin dan naranin camp thaw le crusade thawnaw chuh ban phun ah ei in ngaitanaw deu nisien a hawi. In kohran (pawl) inhlim am ? An hlim chun an det deua ngai, an hlimnaw chun a ban a det raknawa ngaina ei nei. Pathien chawibiek dinga ei inkhawm hrim hrim khawmin, ei indawn tak chuh in hlasak anhawi am? Ringna ban a det tak tak nading chun Bible Pathien thutak hriet dik le hriet rawn a pawi maw.

Chuongchun, ringna chu hrietna leiin a hung um hlak.... Rome. 10:17. Ringna hi hrietna boin a um theinaw ti inla inkhel naw nih. Ringna nei ding chun a hmasatakin ei ring ding hriet a pawimaw. Ringna indik le indiknaw chu ei thil hriet indik le indiknaw ah annghat a nih. Dan naranin ei ram ringtu kohran (pawl) ei baksam tak chuh, Pathien thutak hrietna hi a nih. Chu sinsiena hmasatak chu ei Sunday sikul kai dan hin a hril fie em em, suday sikul a Pathien thu ngaituo chu ei pei nawa, Sunday sikul chu a thlarau thrangnaw deua ngaina ei nei khawm a hawi. An nawleh ei standard an sang deu taa, tulai trawngtakin Pathien thu khawm hi free home delivery ei beisei a hawi?. Ei thuring Bible, ei hriet dan hi an dik le diknaw ngaituoa, en en nekin second hand thuomhnaw cheng sawmnga man, thla khat vel chau hak ding inchawk dingin ei fimkhurin ei en nasa lem. A bikin thralai hai hi Bible Pathien thutak tiem le ngaituo ei tlawm em em. Bible tiem peilo e, ti lo chun, tulai chu ka hratnawa ka trawl bawr bawr el anih ti trawngkam hi fashion angin ei hmang. Ei hril rawn em em Piengthar (born again) hi camp le crusadea a um angin ei ngaia, piengthar dan indiktak chuh Bible Pathien thutaka a chau hmuthei anih. Ringtu hratna dan ding thu chu Bible chaua hmu thei anih. Dan naranin thlaraua ei buoina le ei hratnaw nasan tak chu ieng dang an nawh. Bible ei tiem pei naw lei anih. Threnkhat lem chun,khuotieng or ei vengtieng an fe phaa intuoi thar inringa, khawpuia chu ringnaa hrat theilo ding hrim hrima in-ngai pawl khawm ei kat nawk nisien a hawi. Ringna leilak ban ei phun dan hi ngaituo um tak ei tih, hieng hai lei hin buoinaw nadinga ei buoi anih. Worli Bandra sea-link leilak ban tuipuia anphun dan ka hrietnaw angin, dettaka ringna leilak khawvela phundan hrelo ei tam awm de aw.......Ei hratna ding le ringna ban dettaka ei phun theina ding hi vana um an nawa, vana inthawka hung tla ding khawm an bawk nawh. Ei hrietnaw lei anih. Ka mihai chu hrietna an tlaksam leiin sukbohmang an na.... Hosea.4:6.

CHANCHIN LAWRKHAWM

** Jimry le Darhawihnieng, Shillong tieng hun iem-a-ni chen an hang cha’m hnung-in,23 July, 2009 khan Mumbai an hung tlung nawk tah.Hmarkhawlien Rengthei, a pum lien le thlum tak tak an hung phur ni-in chanchin ei lo hriet anih.

** Ei volleyball star le ONGC a Geo physicist sin thaw lai mek Pu Kaprosang Joute chu 24 july khan Mumbai a hung tlung nawk tah.Hieng klai zing hin, Pastor Siesang ruok chun, a puonthuo lo ziel in, a nu le a nau a ngai bawk ta nieng a tih, Pune tieng a mi lo maksan tah.

**Henry Lalngaizuol chu medical check up le inzawma, hun iem-a-ni chen ei ni lai a um hnungin, karthar hin Rengkawpui pan-in Mumbai liemsan a tih.

** Kalina hnesaw tak-a mi enkai pektu le bieltu MLA ang el-a, tutu ta ding khoma trangkai em em,MT ngaisang Tv. Hau Joseph (Street Hawk) khom khang chen sin thawna ding ngaiven hnungin,O2 Spa ah sin lo mu-in,zirtawpni khan Powai a traning alo tran tah.LoC Lower House hai in Tv.Jakob Sakum thang sa-in, zani zan khan ruoithre meuin ropuitak takin a lawmna an siem, zingkar an ruoi anthe phak chau niin thu ei dong.

** Hung tlung ding August 15, 2009 hin HMAR CHRISTIAN FELLOWSHIP, MUMBAI INKHAWMPUI VAWIKHATNA ropuitak le puithu taka Lonaval hmuna buotsai ani a.Hitaka thrangseng dingin mitin mani tieng senga lovin singsa seng ei tiu

Monday, July 20, 2009

Mumbai Tuisunsuo 19-July-09 Vol 1 Issue 42


HERMIL HRINGNUN

Simeon L. Joute

Khawvel a dangin hma ei sawn pei a. Hrietnaw karin ei lo inkang tiel tiel ve thung a. Tu lem hin chu dingdihlipa ei lo thlier treng treng- Mumbai, Delhi etc a hai ei lo inhnawm hruot ve ta mei mei el. An khawdawk le an kuiluot pawl ei in pel nuk zing a. Vadungte angin kil-tin kil-tang an thawkin ei luongkhawma, tiem khawp chuh ei hang intling kieu el tah. Leh, a min an hril Sleepless City ah hringnun chu ei hang hermil pei chu a nil ta a. Ei hermil dan hai ruok chu in ang naw rep rup hleng a tih. A tran mek lai um ei ta, a kip-a-kawia hi lai nunphung po2 lo hermil ta khawm um mei ei tih.A tha a ngai phawt chun a pawina um nawh. Hnam dang dan tha hai chu lang ei ta ti a la ni pei khah. Hieng tieng pang hih in nal (expert) zata ei graduatena a ni reng hrim an nawm. Kei khawm a ieng2 khawm ni sien kan rempuiin ka changsawn ve tho a, kan admit ve top. Ieng po kahwm ni sien, kha van chawkpawlna lei khan vai/sap etc hnam ka/ei va ni duok chuongna um naw a, zuk thre thrawp ding chun HMAR takhlawk el pa chu ka la ni zing tho.A tak tak pa hi a pawimaw ti na a ni chuh Ei hringnun hi Sana battery chau hnung,hermil tuol zing ang deu, hermil talaklaw chun hermil ding a um ngat ngat el hlak. Ei sakhuona khawm thil dang2 leh ei hung chawkpawl ta pei a. An hme thei rak naw khawm a ei in rempui tum phet2 a. “A awm, a mawi tho” tin ei inthiem rak naw san ei zuk inthiem fawm pei a. Lam huna khawm ni sien, a thlarau thawk naw sa san ei van hermil tum nawk phet2 a. A battery hring tha lo na ma chu LALBIEKNA le a bo an ruol nawk hlak. An leh chu lo ni sien, hermil fawm in Kriestien nundan po po lo zawm famkim la/lang, LALSIPAIHAI intlar huna a mi sanhim zo diem. Ring chu um nawh. Mi hnung hnawt ei ni tlat leiin an mi maksan tho2 ding. Mi nun va hermil ringawt hin umzie a nei phak naw ding a ni chuh. Pu Stephan C Hmar in,’Um kawrawng tui a nampil thei lo(Tarsis Hripui) a ti ang deu khan ei lan leng dawk tho2 ding chu a ni awm a. Ei nu-le-pa kriestian tha tak an ni leiin ei thla a lo muong viu el thei. Ei va hermil pa/nu hlakin a mi fen kai zo awm si nawh. Lum lo,dei lo na na chuh kai lo tla lo bawkin suom lai ei in tang ding ti dam ni sien chuh a zie la umin hermil man a la um deu rawi maw. Hlak chu thil thei ni mang si lo.Kriestian nun hi a laklaw (a kher kherthlaw) in a va harsa ngei.

INHRIETTIRNA

Mumbai Thlahmur(August 19, 2009):Liemtah Chawlni thlahmur ni 12 khan Hmar Christian Fellowship Mumbai Executive Committee inkhom ko a ni a.Hi inkhomna a hin thu poimaw tak tak Mumbai khawpui a la um ngailo hai, Pathien hratna ringsana thaw dinga rel anih.Chulai-a pawimaw zuol biek hai chu hieng hai hih an nih.

· Hun sawttak a inthawka Hmar nau hai,hmun dang danga chenghaiin ei i buoipui mup mup,Hmar Gospel Centenary 2010 chu India tlaktieng rama cheng state pathum hieng Maharastra, Gujarat le Goa(MGNG) inkawpa hmangkhom dan ding nguthluok taka ngaituo anih.Mumbai tieng panga inthawka rawtna siem dan chun, Pastor Lalsiesang Joute kolkhawmna le keihruoina hnuoi-a MGNG hai anthawkin palai inthlangsuokin Organizing Committee anhma thei ang taka indin dinga rel anih.Chu dungzui chun Mumbai a inthawka Palai ruothai chu HCFM Chairman le Secretary, MHWA Chairman le Secretary hai ruot nghal an nih.A hmang dan ding le a programme hai chu an ni chunga ngansie ania,anni in trul le thra an ti ang peiin hung induong an ta,a ni le a thla chu nakie le vantlang hriet dinga hung insuo nawk nieng a tih.

· Mumbai-a a voikhatna dinga Mumbai sunga cheng vengbuk dang dang intuokkhawm/inkhawmpui hmang dinga relthluok a nih.Rel dan a chun hung tlung ding August(thlazing) 15, 2009 hih hei tinzawn phot anih.Hi programme hi tlawmngai taka bawzuitu dinga ruot hai chu- Marc Lalrohlan, John K. Dulian, Joseph Songate, Joseph L Joute Christopher Lalrothang, Simeon L. Hmar, Jacob Lalmalsawm, Stephan L Hmar le Daihmingthang Pudaite -an nih.Mitin mani sin senga buoitak tak vong eini tawl lein,a thei a, chawl ei lak tawl tar au rau si leh,Mumbai puo tienga hmang nisien ti-a ,rawtthluk anih.A hmun ding hin Lonavala(YWAM) ti phot anih.Hall booking tieng mawphurna la dingin Pastor Lasiesang Joute dande anih.Hi a chunga tlawnga a ei ruot hai hin, a programme hung induongin iengkima fe dan ding,thalai thu le hlapawl in elna le a dang dang hai hung siem an ta,Programme kimchang lem karnawk hung insuo nieng a tih.

· September Beiruol hmang ve thra a hriet ni leiin hmang dinga relthluk anih,September Beiruol hih hmang ngei ei nuom nasan chun kumpui linglet sin inrimitakin ei thaw-a, thlakhat sung na na chu Pathien ei mamaw zie, ei ngai le trul le Ama ta dinga thlakhat sung chu hun hei pe inla ti lei anih.Ei thupui ding le ei hmang dan ding tlang pui chu thlathara tarlang nieng a tih.

CHANCHIN LAWRKHAWM

~ Union Biblical Seminary (UBS) ah Bachelor of Divinity 2nd yr inchuk lai mek Zoliensang Joute chuh, Hmar Christian Fellowshop Mumbai lai weekend ministry hmang dingin zirtawpni July 17 2009 khan Mumbai a hung chuong kai.Chuong ang bawkin, Elizabeth Khawbung khom a PG hun sawttak,Rengkhopui tieng a hang suksan hnungin,zirtawpni khan Mumbai a hung tlung nawk tah.

~Pu Darthangluoi Sinate chu Sinate’s Creation in thuomhnaw chi dang dang a thruoi chei hai hang suklang dingin tuta kar liem ta khan Delhi a hang inzin.

~2009 Mumbai Hmar Welfare Association(MHWA) registration,a thar le renewal hih August thla chena thaw thei nieng a tih.Chuleiin,mi tin a lan register lo le renewal ding hai chuh hung ngai pawimaw in,August thla tawp chen Welfare fee,Finance Secy John K. Dulian kuoma pek thei nieng a tih.

~Henry Lalngaizuol chu medical check-up thaw dingin Mumbai,ningani khan a hung tlung.Henry hih MHWA, Finance Secy sin lo chel hlak anih.

TRONGBAUS

Jacob, I conscience in a la kik dat dat che chun, I lung sukmuong roh.Pathien in a la maksan naw che ti na,a ni chuh”

John K Duhlian(Proprietor :Sinlung House)

“ Voisun-a ka Bible tiem ding hih,ka pienga inthawka ka bible verse by heart hmasa tak nih.Trongtrai khom khah ka lo practice by heart top anih”

Sally Lai-rai(Sr. Member, Sinlung Casino)

“ tuiruong tui dawn phak chin hih chu ngaituo ding meu kan um le.Kan khat hin kan in todel hne anih”

Reuben-David Khawbung

“Chanchin tha,chanchin tha, ei ti;ei ti-a,Chanchin tha hih iem ani lie?”

Pastor Pa

“Ka room mate pa’n, weekend zat-a, Destination Kalina, a lo ti zie hih, a san le an hoina thuruok kei ngei khomin ka hriet ve tah“

Benjamin Khawbung(Dais mate in Vashi & Kalina lengs)

“ Da Gurdian ka hung tlung nawk ta ie...tuhin chuh Rengkhawpui ah ka hang in tuoina’m ta boka,LOC upper House chu khuoiva lu’n lai chu nepte nieng a tih”

Elizabeth Khawbung(Da Guradian)

Monday, July 13, 2009

Mumbai Tuisunsuo 12-July-09 Vol 1 Issue 41

HMING HER DANGLAM

Darzakhum Songate

Kum 1987 khan Kolkatta ah B.A. kan chuklai sinussitis natna ka nei leiin, Muslim doctor pakhat ka zu pana, a prescription ah khan X-Ray lak dingin ka hming Darza khan ti in a mi ziek peka. X-Ray clinic ka pan nah radiologist chu Hindu kulmut deu, a bawka thil nalsen hluk el hi aniah; X-ray report ah khan ka hming Durga khan tih in a mi ziek pek nawka. Fiemthu thawna dingin mawi reu tiin X-ray report kha kum iemani zat ka kawl. Sawrkar sin ka thaw hnung hin a tawi zawng baka mi hrietthiem thei ding ringin D. Songate tiin ka ziek hlaka, khawm chu vai hai hin intak anti am anih, an fimkhur naw lei am anih an la ziek suol rawp hlak. Dibrugarh ah X-Ray report bawka D. Sengupta tiin felfawkin hming an mi siempek bawk.

Hnam dang hai hin ei hming ko indik chu hrillo, a zieka an ziek suol hi chu thil pawimaw raklo ah chu ngaithiem an umtho. Eini hi a phuok tu haiin ditdeuva an phuok, ei hriet mi hmingtaka kolo hi thil indiklova khawm ei ngai phaknaw hi maktak anih. A mak nawkzuolna chu a phuoktuhai khawm in an pawisa raknaw ah, kova um hai khawm hin pawi eiti beknaw.

Eini mi laia hming inlar pawltak chu Pu Lalthlamuong Keivom I.F.S. retd. hi ning atih. A phuoktu chun hming umzie inthuktak neia ah phuok pek anih. Pu Lalthlamuong hi a ruolhai leh eini mi a neka upa hai ruok chun ngaina le duot deuin Muonga tin anko tlat. Lalthlamuong kha Muonga tin ei in changtira, eini a naupang deu hai lem chun Pu Muong ti rikngawt in ei ko nawk. Awrizinal hming chu a kawk phak tanaw hle. Nisienlakhawm a kotuhai khawmin maka ei ngainaw; ama khawm hin a pawisa chuongnaw ah ang.

Vengtieng khin mi threnkhat chu an hming letling deiin ei ko. Lalkiemlo hi a thren chun U Kiem antiah. Laldailo khawm Daia tiah ko anih.

Mumbai ngeiah khawm hin Pu Stephen C. Hmar hi annu takngielin, Ste tin a hang kova. Vai han lo hriehai sien chu, Stay ti rikngawta hang inko chu mak anti el thei. A kalpenlai a nuhmeiin a hnungtienga inthawkin Ste tiin hang ko sien, ama hi a lawnlai chat chawtin hang inhawi sien chu a hmu hai chun chu pa chu nuhmei pakhatin stay atiah a chat chawtel, a thaibawi de, ti pal rawinaw ni ham( a thaibawi nawh ah chu!!). Stay tiah min anko hnunga la hang lawn vuk vuk hlak chu a mawl tlak awmsi. Chuong ang bawkin Pu Darthangluoi Sinate chu, U Luoi, Pu Lalramthang Amo chu, U Ram, Nk.Zarzokim chu, Zari tiin ngaina deuin ei inko suk vel neng nung el anih hi.

Ei bau thabo leia mi hming a tluonsuoka ei ko peinaw hang ti thei chu ni chuong silo. Entirnan Mumbaia ei Welfare Vice Chairman hi ah hung thlung hlim khan Marc Lalrohlan kanih tin a hung in report ah. Chu chu Marc tiloin Maarka ti kher kher in eilo ko nawksi. Pu Lalrothang Tusing hi a ruolhai chun LRT tin a kova. Hihi Lalrothang ti le chu bau chang zat an ang thosi. Ei in ko indoutna ti ding hlak chun hieng Hrangdanglien (Danga), Joseph(Seppa), Darzakhum(Darza), Paukhomawi(P.K.) tihai hin duotna rawng a kai zo naw baka, hming tak kha kawk phak ta reng reng lo. Hmai trim thrak lova inko in, kova umhai hlak inring kungin ei inhawi bawk.

Ei hming pel metin ei inkova, inhawi pawi eiti chuongnawh. Ei tradition khawm alo ni bawk. Hming letling dera inko khawmin ei inhawi tho. Nisienlakhawm hming tluonsuok hmang ding huna hmanglo,mi hming indiklo le nina indiklo hmang hi manner hrietlo a hlaw baka mi lung sukinhawinaw tirtu ani thei.

Vawikhat chu vai Officer lien inti ve deu hi Chief Guest dingin hmunkhata an fiela. Fielna hi lekha ngeiin an hungpeka. An fielna lekha a hang en zo chun iengleia Chief Guest dingin an fiel am ana ti ah hang indawna. A fieltu hai khan an ngainat lei le thil dang an fielna san an hang hril chun ana aver nawh hle. A san chu a hming le ani na kha indiklovin anlo ziek lei anih. Ama chun chuonga mi ngaina le mi pawimawh a in mi ngaisi chun ka hming le ka nina bek khawm hi in hrietnawh am anih ti zawngin a dawn veh.

Hming hi stage annawhleh pulpit vela inthawk chun a tluonsuok ngeia hmang a thra. Chun news ah hai khawm fiemthu column or sms news annaw ruokchun andik pa tak hmang hlak ding anih. Fielna/greeting card hai khawm hi mi ei ngainat leia ei pek anni leiin hming spell indiknaw le nina indiknaw hi ziek ngai ding annawh. Mi thil ei hnina lekha ziek dam hin annina le an hming indiktak kha ziek hlak ding anih.

Mi hming hi an inahwi peinaw chen raka thlengdanglam hi thil thra ani beknaw.


CHANCHIN LAWRKHAWM

~ Dorothy Songate,kha hma pova Bangalore Hmar Welfare member lo ni hlak chu, National Aviation Company of India hnuoi-a,Indian Airlines ah AirHostess(Cabin Crew) sin lo hmu in,tarik 05 july 2009 khan Mumbai a lo hung chuong kai tah.Tuhin thla 6 sung training dingin Air India Colony Girls Hostel,Kalina-ah a um.

~ Tuta kar sung ei Pastor Lalsiesang Joute chu a rongbawlna hung sunzawm nawk dingin, Kalina a lo hung tlung nawk tah.Chuong ang bawkin mimal trulna leiin,Baroda tieng ei member hai Pu Lalsansuok le an nu Pi Lalnunsiem hai khom Mumbai an lo hung chuong kai bawk.

~Pu Lalthrakhum Khawbung(Buonga) le Laldomsang hai chuh ei ni lai hun iem-a-ni chen a um hnungin,zani inrinni tarik 11,July 2009 khan Tuithraphai tieng pan in a lo liem tah.

~Ei Welfare Chairman,Pu Darzakhum Songate chuh hun iem-a-ni chen Bandra Kurla Complex(BKC) Income Tax Office ah Additional Commissioner sin a thaw hnungin,Income Tax Office,Church Gate tieng-a transferred a lo ni tah.

~MT Lenglai Gurup Membhai hai chuh Pastor Pa rawi-in,zani zan(zanril) khan Sinlung House(Proprietor:John K Duhlian,Joe Songate) ah Rome,Bible study an nei pui.


TRONGBAUS

“ Tuhin Pasal le pasal,nuhmei le nuhmei hi in nei vong ta in la, chi ei inthla thei naw ding ana.Kum 100 khat hnunga chu tunam hnuoi ro hlu’ng an ta?”

Rama Amo

“Lenglai Gurup hai hih, zingtieng dar 3:00 hnung-a nunghak leng dinga insuok chau nasan hih,I aw a san ding awm-a ka ngai chuh,phak deu ta hnung chun,nunghak hai khom khan “awveh” hang ti khah a awl ta lem-a, a nih” Darzabhai(Roneikim Pa)

“Kei chu trantu or mi hma-a thu hang hril nekin hlasak or Lam char2 ka nuom lem……”

Rody (Salsa Dancer)

“Iem tulai hin a khuosawt in mi ti in mi ti a,ka khuo a sot ta lo zan...Vanlalsailo hla chu ka dit reng ani longtime back a in thok……..”

Sienglienkhawl

“MT lenglai gurup hai hin Zari hi kan leng hman naw reng2,a chol sun2 Goregaon or dinner a ka fe ding ati nawk pei..Zarvuongi ni loin Zarvangi ni lem raw sen..

Jacob Sakum (aou aou Saghi)

“Sepa in a mi leng fuk thei naw chun, ka leng hrat hle nieng a tih.” Zari (Zarvuongi)

THIL INHME HAI

~Pastor Siesang le Pulpit chum puma dingdihlip rak rak.

~RT Varte le guitar per puma Second voice thaw.

~Zarzolien le purda system thaw ang deua Boksam thrin

~Sally Lairai le Jeans shorts (in sieng tei tei).

~Buona(Buonlywood) le half pant puma Office kai.

~Marc le Kwality chai, thingpui(Lemon tea nge) dawn.

Monday, July 6, 2009

Mumbai Tuisunsuo 05-July-09 Vol 1 Issue 40

EI THIL HMU DAN AN DIK AM?

Pastor Lalsiesang

Chuongchun an pahni chun an mit a hung var a, saruok an nih, ti an hung inhriet tah a: theichang hna’n puonbil an siem fawm ta a, chuongchun, huon lai a chun Pathien an inbiksan taa, Gen,3:7.,8.


Ei thlatu bul Adam le Eve in Pathien thupek bawsie-in, Pathienin faklo ding a ti thingra an fak charin an mit a hung var ta-a. An mit var dan hi mak tak anih.Pathien ropuina le hmangaina hmuna nekin an saruok ni zie an hmu lem tlat, saruok ti hin umzie inthuk tak a nei, a tlangpuia ei hmangna deu chu pasie, iengkhawm neilo, inzak umnaah ei hmang deu hlak.Vawisun hin ei ni khawm hang in ngaituo’ng ei tiu, ei mit var dan hai hi. Pathien ropuina le hmangaina nekin mani saruokna, pasietna le inzakna ding ngawt ei hmu el rawi mawh! Ei lo hmu pal an chun, suol ra ani ti hre-in Lalpa kuom tieng kir ei tiu. Ringtu threnkhat chu Pathien nei a insal si, pasie inti ngawi ngawi, lungawi le lawmna ding hrim hrim neilo. Pathien ropuina le a hmangaina hmu-a, Ama Pathien chuh inpak nekin mani tlinnawna le felnawna chau hmu-a inzak ngawi ngawi-a hringnun hmang an um bawk. An mit-var dan chuh Pathien-a inthawk sawnin, suolna leia mitvar an ni reng hrelovin, tlinnaw, felnaw le pasie ngawi ngawia an inhrietna tak chu an chapo pui hlak. Chuongang mi chu ei lo ni el rawi mawh?

Adam/mihriem chu Pathien hlimthla/inlang-dan a siem, Pathien’n mihriem a siem hi a siem zova a mak san el nilovin, inlai chinna neizing dinga a siem anih. Mihriem chu Pathien a innghat ding le a ma le relationship/inlai chinna nei ding a siem a na. Ei hringna le iengkima Ama Pathienah innghat chuh Pathien laka mihriem mawphurna pawimaw tak chu a nih. Amiruokchu mihriem suola a tlu char khan, saruok/tlasam a ni zie a hung inhrieta, chu saruokna/tlaksamna chu inkhum dingin manikhata intodel tumna lungril a neia, a nei chau niloin, Pathien thrang loa mani intodel nuomna, Pathien pawimawa inhrietnawna a hung nei nghal el a nih. An saruok inkhumna dingin hna thruiin silfen an siemfawma. Vawisun hin ei ni khawm hang in en ei tiu. Tlasam le pasiea inhre ngawi ngawi siin. Lalpa thrang lovin mania intodel ei lo tum el rawi mawh. Mihriem hringna hi fak le dawn le silfen intodelna chau hin a thla a muongin a lawm thei ngai nawh. Mi tam takin an thlamuong nawna chu sum le pai neia in suk thla muong an tum hlaka, sum le pai nei theina a ni phawt chun iengkhawm pawisa loin sum an zawng hlak. Chuong mi hai chun an nei rawn deu deua an saruokna an suk lak deu deu hlak. Ama Isu Pathien ngeiin hieng hin a lo tih: “Mihriem hi fak le dawn le sil le fen chauin hringin, an thlamuongnaw ni haia, Pathien baua thu tinsuokin hringin thlamuongin um lem an tih,” Matthai, 4:4. Lalpa Pathien chau naw chun mihriem hi saruokna le pasietna a inthawka sansuok theitu iengkhawm a um nawh. Mihriemin saruok an hrietna hi; sum le pai, sil le fen, a tlasam leia an hriet niloin, Pathien thupek zawmnawna leia saruok,pasie,retheina hi an hriet a ni lem sia. Lalpaah ringna le beiseina innghat loa mani theina a innghat ei ni chun mi lungsiet um tak ning ei tih. Jeremia 17:5-8 ah chun, Lalpa chun hieng hin a tih: Mi mihriem ringa, mihriem ban hratna ringsana, a lungril khawm Lalpa-a inthawka hran ta chu a chung a rik! Ama chu thlalera hlobuk ang ning a ta, thil thra hung tlung khawm chu a hmu awm si nawha, thlalera chun hmun trawl lai lai chu hluong a ta, chilung ram chuh. Mi Lalpa ringtu le Lalpaa beiseina innghattu chu a hamthra. Tui sira thing phun, a zung khawm vadunga kai ang, thina hlim ruom a hraw lai khawma tri lo, khaw inthral khawma a hna hai hring zingin ra insuo zing a tih. Pathien hlimthla(image) a siem ei ni ang bawkin, ei hringnun hi Pathiena innghat ding ei nih, ei iengkim hi Ama a inthawk le a ma zara um ei nih, ti thutak hi ei hriet a trul tak zet. I um dan ding chu Lalpa chunga innghat la.Ama chu ring la, ama in thaw vawng a tih. Sam 37:3.

Mihriem chu suol-a a tluk charin, Pathien ama siemtu,thil po po hretu nitina an pawlpui chu inbiksan thei a ringa, inbiksanna lungril a hung put nghal el a nih, chuongchun, huon lai a chun Pathien an inbiksan taa, Gen, 3:8. Suolin mihriem a hang sawisak tak tak pha chuh a suk vet phawthlak, Pathien siemtu le iengkim hretu chu inbiksan thei inringna an nei tir a, A mak ngeimaw Pathien inbiksan thei ringna an zuk nei el hi, Pathien hmu phak nawna hmunah an um thei hrim hrim dim maw? Lal David chun a rukin, tu hmu loin a sipai General Uria nuhmei Bethseba a uiretpuia. An lalna le thuneina hmangin a suolthaw chu thuphmang a tuma, Amiruok chu Pathien iengkim siemtu, hmutu le hretu hmaa inthawk chun iengkhawm thup thei a ninaw zie chu, Lalpan zawlnei Nathan hmangin a thil thaw chuh hienghin a van puongtir a nih: Lalpa chun hieng hin a ti a nih, “Ngaita, nangma suongkuo laia inthawk ngeiin i chunga thil thranaw in suoktir ka ta, i mithmu ngeiah i nuhmei hai chu lapek kati cheh a, i venghai peng ka ta, sunkhawvarah i nuhmei hai chu zal pui an tih. Nang chun chuh inrukin i thawh a, kei ruok chun chuh Israel mihai po po mithmuah sunkhawvarah ka thawding a nih” tiin in, 2 Samuel,12:11,12. David chun Pathienin iengkim a hmu zie le a hriet zie a hang hriet chun hieng hin a hung hril ta anih;”I hmaa inthawk hin khawlai am thlanhmang ka ta ? Vana hang lawn lang, chu taka chun i um sia, Seola zalna siem lang, ngai ta, chutaka chun i um bawk sia. Inthim khawm a nangma kuoma chun iengkhawm a hlie nawh a. Zan hi sun angin a var lem anih: I ta ding chun inthim le var hi thuhmun zing an nih, Sam 139:7-12. a lo tia. Vawisun hin ei ni khawm Adam le Eve ang hin Lalpa Pathien ei inbiksan tum el hlak am? Lalpa hmuphak loa um thei ringna ei lo nei el am? Suol chun Patien hmu phak loa umthei dingin ringna a min neitir hlak a, ei nuom nuoma khawsa in, siemtu Pathienah innghatloa mania innghata hringnun hmang dingin a mi thruoi hlak. Ei mit vardan hi an dik chie am, in enchieng a hun.


CHANCHIN LAWRKHAWM

~Tarik 2, July 2009 khan Nk Lalruotkim Joute chuh Sion Hospital-ah, a kampui natna le inzawmin minor operation thaw naih.Chuong ang bawkin,zani inringni tarik 4, 2009 Nk.Ruthi Joute chu pile natna le inzawmin operation Noor Hospital, Kurla a nei anih.Damnaw hai an hung dam vatna dingin ei trongtraina hai-ah hre zawm pei ei tiu.

~Ngurnunsang le a sangnu Rohmingmawi hai chu tuta kar liem ta khan Kalina ma ma ti in,an lo hung insawn lut tah.An in address thar hih, ei hriet thei dan dingin,a hma-a Mawinu(Beautiful) hai lo umna khah anih.

~Elizabeth Khawbung chu trulna leiin tuta kar liem ta thawleni June 30, 2009 khan,a mawphurna Da Guardian pawimo hle sien khom, Rengkhawpui tieng pan-in a lo liem tah.

~Benjamin Khawbung chu Nirmala Niketan ah Master Of Social Work (MSW) seat lo hmu-in,karliem ta khan class a lo zawm tran ve tah.Hun sawttak Powai tieng-a,a um hnungin,James Pudaite le in room mate ding in,Vashi tieng a lovin sawn phei tah.

~Vashi tieng-a ei nunghak hai Edith ,Catherine le Dorothy hai chuh tuta kar liem ta khan,an sinthawna, hnai le remchang ding leiin,Andheri (E),Chakala tieng an lovin sawn phei tah.

~Ngurnunsang, Dorothy Khawbung le Ruthi Joute hai chu Gebbs( Andheri) ah sin thar an lo hmu der tah.MT chun a lawm pui hle.Anni hih tarik 13, july 2009 hin an sin thar zawm an tih.

~Pu Kawlvelthang Amo,hun sawttak ei ni lai-a a hung um hnungin karliem ta khan a naunu Marisha Vanhlupui leh Shilong tieng an lo liem tah.Hieng lai zing hin Siemmawi chu tulai hin Mumbai-ah a hung chawl ve.

TRONGBAUS

~ Ka U Eli’n PG Manager sin ami zuk in hlan chi ei thluok a buoi ram2 el an nawm, ka Hmai khom ka buoi pui hman ta nawh… Neihlupui (Gulthabi)

~ Thil mak deu pakhat chu May-June lai khan lum leiin imu ei khop nawa,tulai ruok hin chu imu in hnik talu leiin Imu ei khop nawk nawa, I don understand” Lalal (SuperIndt NSSU)

~Usss..bhai zani zantienga kan Moivie en kha chu a hall kha a fuok top..kan en pui hai kha ka hriet fu naw top tie….Oberoi Mall mew kha cha aw..Joe Songate (Sinlung Analyst)

~Mi pui hma a ei ngir chang hin tarmit(Spec) siem thra vet hi nghok a um ta em el ka ti leiin Spec flip-in flip –off chi ka awr thruoi el ani….Darthangluoi (Edlyn Papa)

~Tukum Sikpui Ruoi 2nd session a thrang chau ding ani,fresher’s Miss ni pal ka ti...Siemi (Miss Sinlung Extn)


THIL INHME HAI

$$ Jeru Lalnuntluong le naute zong malam a leng

$$ Lalliensung(TISS) le inkhom naw dan ding zong

$$ James Bossini le Tibur(tuibur) hmum

$$ Joy Rebecca le khop talu ang el a phing tuoi tuoi..

$$ Rody le Doll Inchu dinga mi fiel

$$ Stephan C Hmar le Tiffin Box

$$ Hau Joseph le “ A umna hriet lo “

$$ James Dais le a Bag pai

$$ Dr Kimi le “Edlyn in trin vat a nuoma “

$$ Rosiemlien(Gou) le vai film bie chur chur

$$ LRT le khuosawt

$$ Jacob le Solacid/Digene/ORS etc

$$ Nemzahat le Cigarette Paak