Monday, April 30, 2012

IN TIENG PAN TRAIN - Stephan C. Hmar

Mumbai Local Train-a chuong hi ka nitin routine ana chu rinum ka ti a, thlakhlana ka nei ngai nawh. Kei chau ni lovin mi dang khawm an ni ka ring.

          Ei hriet seng ta angin Mumbai Local Train chuong chu neka dung insanglem hai zak rim ap taluo inhnamna a na. Kei lem chu, ka chuongpuihai ka neka dung insanglem deu vawng an ni hlaka, zak rim ti vel hi chu variety dang dang inhnam ding ka hnieng-in-hnar thei khawp el a nih. Neka dung inhnuoi lo umve sun hai hlaka, an lurim thum taluo’n hnarkuo inphalam thak lovin an hung in attack-tir nawk a. Ringna rama ei unau inhnaipuitak pangal-hai hlak, ei hei chuongpui changing, tienlai Mosie chanchin annawleh Leviticus hun laia an inthawi dan inchuk ve ei nih ti hre chang lovin, an khakhmulin ei hmai an hung inhruttir sal sal lem nawk nghal. A chang chu an khakhmula mana, thenvir a, train kawtkhara deng dawk pawp pawp ka nuom hiel chang a tam. Hieng  hman hin a rinum hle tah ti nak karah, ui chal hawnin, uipui ngainobei tawk tak inchua an innghar tuo ang elin, pa le pa, nu le nau nei zel zul ta haiin, ke bawpkhat chau hmun inchuin an innghartuo zing bawk. Hui Ha! Train chuong tak zet hi chuh! Tubou le doulung inkara inzep ang hlawl a nih.

Hringnun tluonglam ei hraw laia rinumna ei intuokpui tamtak hai hih, theida a awl a, ei pathien, trap chier hla inzawt khumna taka hmang khawm a awl hlak a. Amiruokchu, ei ngaituona kawtkharhai hawng lien a, ei ring pathien thu leh ei suimil chun, umzie le manhlana an nei seng a. Ei nun rama di’n inchuktirtu an ni seng el hlak a nih.

Kei khawm, train chuong hi rinum sien khawm, intieng pan train a chuong hin ngaituona danglam tak a mi pek hlaka, ka ngaihlut pha hiel a nih. A tu el ta ding khawmin, ei runlum chit a lo hlut chungchuongzie le hi khawvela ei inzin zo pha, ei chatuon in inhawi, khawvela ei in let tama inhawi lem la thlung dinghai ei nizie a min chuktir a nih.

Office trinin, ka intieng mi phur thlungtu ding Train ka hei chuong pha, ka ngaituona po povin “In ka thlung pha chu” ti ngawt a suongtuo hlak a. In ka thlung pha chu, ka lungdit leh inhmu nawk kan ta, lungril hmunkhat, tui anga luongkhawm chu chen nawk kan ta. Chu pha chun, a hmin a sel, an hnik an hniknaw, a mawi a mawilo haiin umzie nei ta lo ding an na, tiin ka suongtuo hlak. Hi ngaituona hlimum hin, vai kara thlantui far thlawk thalwkin inzep hlak lang khawm, a mi thlamuon hlak a. Mu’n ar a laka, hmun fienriel a panpui ang hin ka rinumna chu lak hmangin a uma, ngaituona paradis ka chen hlak a nih.

Ka chuongpui vaihai ka hei mel hret hret hlak a. A then hmel fai tak tak an na. A then ruok chu, hmel burip tak tak, an hmaiphek chite sunga sietna pa si-saw mawng dawk vawng dam an nih. A then, hrisel le vanglaini chena, nga sanghal inper anga um trawk trawk hre lova inper inper dam an na. An ni lai chun, tar, sam var le hmai vun trawm kheng khung an inthung ve hlaka. Polythene hin thil an khit bawk trawn a, in an thlung phata an tu-le-tehai lawm dinga an hawn ni dingin ka ring hlak. Ka hei ei chet chet tawl hlak a. Nghaknu’n par huon chite sunga par chitin a khawi khawm ang ela in ang naw vawng ni hai sien khawm, mawina inang pakhat an suklang tlatin ka hmuh. Chu chu “In thlungkar nghakhla mawina” a nih. Chu pha chun, ka lungrilin, “Kei chau kan nawh ie, inthlungkar nghakhla hih! Vaihai khawma, an runlum, an zalenna, an lainahai chengna hmunin an lunglai a kham vet lat a nih” ka ti hlak.

Hei ngaituo inthuk ve hrim tum. In tieng pan train-a chuonghai angina ei chatuon in panin nitin ringna lawnga intawl ve pei hai ei ni naw am a nih? Ei lawng chuongna hai hi, a ralmuong bik naw a, thlipui le tuifawnin chawl lova a nawt a nawt hlak a nih. Sienkhawm, khuolzintu’n in a thlung phata an hawi dingzie a suongtuo phata, a sawl a dam huoi angin, rinumna phul pik tak hnuoia inthawk hin ei chatuon in ngaituo ve hlak ei tiu. Nitin ei hnai deu deu a nih. Nikhat chu la tlung veng ei ta, Angel ha’n a kawtkhar mawia mi lo tuok ven’g an ta. Ngai ngawi ngawi puma ei the tah, ei pahai dam, ei u-le-nau, le ei lungdit po po hai, dam le hrisel takin hmu nawk ei ta. Hnung tieng reng ngai ta lovin, ropuina nun phamin chatuon chatuonin ei leng ta ding a nih. 

1 comment:

  1. A ziek tu in SCIENCE KHAWVEL' a ziek na a mawi taka a thuhma a ziek mawl kha ka la tiem tha chak ngei el...

    ReplyDelete